భారత దేశంలో ద్వాదశ జ్యోతిర్లింగాలు 12 వరకు ఉన్నాయి. వాటిలో మొట్టమొదటి జ్యోతిర్లింగ క్షేత్రం గుజరాత్ రాష్ట్రంలోని వెరావల్ లో ఉన్న సోమనాథ్. ఇక్కడున్న సోమనాథ ఆలయం అదేనండి ... పురాతన శివుని ఆలయం భారతదేశంలో ఉన్న శివ భక్తులచేత గౌరవించబడుతూ, పూజించబడుతున్నది. సోమనాథ్ క్షేత్రం గురించి పురాణాల్లో కూడా పేర్కొనటం జరిగింది. ఎన్నో అద్భుతమైన చారిత్రక నేపథ్యం ఉన్న ఈ సోమనాథ్ క్షేత్ర విశేషాలను గమనిస్తే ...
ఉత్తర భారతదేశాన ఎక్కువ మంది హిందువులు శివాలయాల్లో దీపాలు వెలుగిస్తూ కనిపిస్తారు ముఖ్యంగా జ్యోతిర్లింగ క్షేత్రాలలో అయితే చెప్పనవసరం లేదు ..! కిక్కిరిసిన భక్తజన సందోహంతో, కాలు కింద పెట్టడానికి కూడా స్థలం ఉండని విధంగా ఉంటుంది.
స్థల పురాణం
చంద్రుడు, దక్షుని శాపం నుండి విముక్తిడిని చేసిన శివునికి ఆలయాన్ని నిర్మిస్తాడు. అదే సోమనాథ ఆలయం. దీనిని మొదట చంద్రుడు బంగారంతో నిర్మిస్తాడు. ఆతరువాత రావణుడు వెండితోను, కృష్ణుడు కొయ్యతోను నిర్మించారని ప్రతీతి.
చిత్ర కృప : username8115
సోమనాథ్ ఆలయం, సోమనాథ్
సోమనాథ్ ఆలయం ప్రముఖ జ్యోతిర్లింగ క్షేత్రాలలో మొదటిది. ఇక్కడ శివ భగవానుడు కొలువై ఉంటాడు. నిర్మించినప్పటి నుండి ఇప్పటివరకు సుమారు ఏడు సార్లు నాశనం చేయబడి పునర్నిర్మించబడింది. చివరిగా వల్లభాయ్ పటేల్ 1951 లో పునర్నిర్మించడం జరిగింది.
సోమనాథ్ ఆలయం, సోమనాథ్
సోమనాథ్ ఆలయం లో ఎవ్వరికీ అంతపట్టని విచిత్రం ఒకటుంది. అది చంద్రుడు ప్రతిష్టించిన శివలింగం. ఆలయం మధ్యలో, భూమి లోపల ఎటువంటి ఆధారం లేకుండా శివలింగం నిలిచింటుంది. గాలిలో తేలినట్లుండే ఈ శివలింగం ఎవ్వరికైనా వర్ణించలేని ఒక అద్భుత దృశ్యం.
చిత్ర కృప : Kaushik Patel
సోమనాథ్ ఆలయం, సోమనాథ్
సోమనాథ ఆలయం లోపల విశాలమైన మంటపం, ఎత్తైన గుండ్రటి గోపురం కనిపిస్తాయి. గర్భగుడి లోని శివలింగం పెద్దది. శివలింగం వెనకాల పార్వతి దేవి విగ్రహం కనిపిస్తుంది. ద్వారానికి కుడిపక్క, వెనకపక్క వినాయకుని విగ్రహం, ఆంజనేయుని విగ్రహాలు ఉన్నాయి.
సోమనాథ్ ఆలయం, సోమనాథ్
సోమనాథ్ ఆలయం దాని అద్భుతమైన చెక్కడం, వెండి తలుపులు, నంది విగ్రహం మరియు దాని కేంద్ర శివలింగానికి ప్రసిద్ధి చెందింది. భక్తులు కార్తీక పూర్ణిమ పండుగ సమయంలో ఈ ఆలయాన్ని విశేషంగా సందర్శిస్తారు. మహా శివరాత్రి, చంద్ర గ్రహణ సమయాల్లో లక్షల్లో భక్తులు సోమనాథ్ ఆలయాన్ని దర్శించుకుంటారు.
చిత్ర కృప : Paulus Veltman
దైత్యుసుదన్ పుణ్య క్షేత్రం, సోమనాథ్
దైత్యుసుదన్ మందిరం సోమనాథ్ క్షేత్రంలో ఉన్నది. ఈ ఆలయంలో క్రీ. శ . 7 వ శతాబ్ధానికి చెందిన విష్ణుమూర్తి చిత్రం ఉన్నది. కార్తీక మాసంలో అధిక సంఖ్యలో భక్తులు ఇక్కడికి వచ్చి దర్శిస్తారు.
చిత్ర కృప : telugu native planet
సూర్య దేవాలయం, సోమనాథ్
సోమనాథ్ ఆలయం తర్వాత, ఆ ప్రాంతంలో అంత పేరు సంపాదించుకున్న మరో ఆలయం సూర్య దేవాలయం. క్రీ. శ. 14 వ శతాబ్ధంలో నిర్మించిన ఈ ఆలయంలో ప్రధాన విగ్రహం సూర్య భగవానుడు. ఆది దేవుని ఇద్దరు సేవకుల విగ్రహాలు కూడా ఈ ఆలయంలో ఉన్నాయి.
శశిభూషణ్, సోమనాథ్
శశిభూషణ్ కూడా ఒక పుణ్య క్షేత్రమే..! ఇది గుజరాత్ రాష్ట్రంలోని సోమనాథ్ - భల్క తీర్థం వెళ్లే మార్గంలో ఉన్నది. ఇక్కడే చంద్ర దేవుడు, సోమ, తన పాపాల నివృతి కోసం యజ్ఞం చేశారు. సోమనాథ్ క్షేత్రాన్ని సందర్శించే ప్రతి యాత్రికుడు శశి భూషణ్ ని తప్పక దర్శించవలసిందే ..!
చిత్ర కృప : telugu native planet
మహాకాళి ఆలయం, సోమనాథ్
మహాకాళి ఆలయం, పవిత్ర సోమనాథ ఆలయానికి సమీపంలో ఉన్నది. దీనిని క్రీ. శ. 1783 వ సంవత్సరంలో ఇండోర్ మాహారాణి ఆహల్యాబాయి హోల్కర్ నిర్మించినారు. ఈ ఆలయాన్ని కూడా భక్తులు తప్పకుండా సందర్శిస్తుంటారు.
చిత్ర కృప : Roshan
వేరవాల్, సోమనాథ్
సోమనాథ్ నుండి కేవలం 6 కి. మీ. ల దూరంలో ఉన్న వేరవాల్ , చేపలకై ప్రసిద్ధి చెందిన స్థలం. సంప్రదాయ పద్ధతులలో పడవ నిర్మాణం మరియు జాలవాహినౌకలను ఉపయోగించి చేసే చేపల వేట ఇక్కడ చూడవచ్చు. ఇక్కడి నుండి భారీ మొత్తంలో సముద్ర ఆహారం విదేశాలకు ఎగుమతి అవుతుంది.
చిత్ర కృప : telugu native planet
భల్కా తీర్థం, సోమనాథ్
సోమనాథ్ లో గల భల్కా తీర్థానికి ఒక ప్రత్యేకమైన విశిష్టత దాగి ఉన్నది. ఈ ఉర్లో శ్రీకృష్ణుని నిర్వాణం చెందాడు. ఈ స్థలంలో శ్రీకృష్ణుడు వేటగాని బాణం తగిలి అవతారాన్ని చాలించాడని చెబుతారు. ఇక్కడికి కూడా యాత్రికులు తరచూ వస్తుంటారు.
చిత్ర కృప : username8115
మై పూరీ మసీదు, సోమనాథ్
మై పూరీ మసీదు జూనాగడ్ ద్వారం నుండి కిలోమీటరు దూరంలో ఉండి, వేరవాల్ కు ప్రధాన ద్వారంగా పని చేస్తుంది. నీలం మరియు తెలుపు రంగు పెంకులతో చాలా అందంగా దీన్ని తీర్చిదిద్దారు. మహమ్మదీయులు దీన్ని, సోమనాథ్ లో ఇతర మసీదులతో పాటు ఒక ముఖ్యమైన యాత్రాస్థలం గా భావిస్తారు.
చిత్ర కృప : telugu native planet
సనా గుహలు, సోమనాథ్
సనా గుహలు సోమనాథ్ లోని ఒక కొండ పైన ఉన్న గుహల సముదాయంగా చెప్పుకోవచ్చు. చరిత్రకారుల అభిప్రాయం మేరకు, ఈ గుహలు క్రీ.పూ. 2 వ శతాబ్దం లో నిర్మించినట్లు తెలుస్తుంది. అందమైన బొమ్మలు, స్థూపాలు, రాతి దిండ్లు మరియు చైత్యాలు పర్యాటకులకు గుహలను మరింత ఆసక్తికరంగా చూపుతాయి.
చిత్ర కృప : telugu native planet
పురావస్తు సంగ్రహాలయం, సోమనాథ్
సోమనాథ్ లో ఉన్న పురావస్తు సంగ్రహాలయం లో ధ్వంసమైన పాత సోమనాథ్ దేవాలయాల అవశేషాలను తెలియ పరుస్తుంది. ఎలా కొల్ల గొట్టారు , ఎలా పునర్నిర్మించినారు అన్న వాటిని సైతం మీకు తెలియజేస్తుంది. వివిధ కాలాలకు సంబంధించిన రాతి శిల్పాలు, కూడ్యాలు మరియు విగ్రహాలు ఇక్కడ భద్రపరిచారు.
చిత్ర కృప : Mihirkumar Upadhyay
సోమనాథ్ సాగర తీరం, సోమనాథ్
సోమనాథ్ సాగర తీరం గర్జించే తరంగాలకు ప్రసిద్ధి. ఇక్కడ పర్యాటకులు అరేబియా సముద్ర తీర అందాలను చూడటంవరకైతే బాగుంటుంది కానీ ఈతకి అంత అనువైన స్థలం కాదు. ఒంటె మీద కూర్చొని సవారీలు చేయవచ్చు మరియు తినుబండారాలను సైతం ఆరగించవచ్చు.
చిత్ర కృప : telugu native planet
అహ్మద్పూర్ మాండ్వీ సాగర తీరం, సోమనాథ్
గుజరాత్ రాష్ట్రంలో ఎక్కువగా సందర్శించే తీర ప్రాంతం అహ్మద్పూర్ మాండ్వీ సాగర తీరం. ఇది గుజరాత్ మరియు కేంద్రపాలిత ప్రాంతం డయ్యు కలిసే ప్రదేశంలో ఉన్నది. డాల్ఫీన్ వీక్షణలకి, జల క్రీడలకీ ఈ ప్రాంతం సురక్షితం.
చిత్ర కృప : Pavan Gupta
త్రివేణీ సంగమం, సోమనాథ్
సోమనాథ్ లో త్రివేణీ సంగమంగా ప్రసిద్ధిచెందిన హిరణ్, సరస్వతి, కపిల నదులు సముద్రంలో కలిసే తీరు మనోహరంగా ఉంటుంది. ఇక్కడ సూర్యోదయం, సూర్యాస్తమం సన్నివేశాలు అద్భుతంగా ఉంటాయి.
చిత్ర కృప : Sangita Pujara
సోమనాథ్ ఎలా చేరుకోవాలి ?
విమాన మార్గం
సోమనాథ్ కి 90 కి.మీ. దూరంలో ఉన్న డయ్యు విమానాశ్రయం సమీప విమానాశ్రయం. ఈ విమానాశ్రయం ముంబై విమానాశ్రయంచే అనుసంధానించబడింది. డయ్యు నుండి క్యాబ్, ఇతర రవాణా సాధనాలను ఉపయోగించి చేరుకోవచ్చు.
రైలు మార్గం
సోమనాథ్ కి 5 కి.మీ. దూరంలో ఉన్న వేరవాల్ వద్ద రైల్వే స్టేషన్ ఉన్నది. వేరవాల్ నుండి ముంబై వరకు రైళ్లు అనుసంధానించడం జరిగింది. ముంబై నుండి దేశంలోని అన్ని నగరాలకు, పట్టణాలకు ప్రయాణించవచ్చు.
రోడ్డు మార్గం
సోమనాథ్ కు రోడ్డు వ్యవస్థ బాగానే ఉంది. డయ్యు నుండి మరియు దగ్గరలోని ఇతర ప్రాంతాల నుండి బస్సులు అందుబాటులో ఉన్నాయి. ప్రవేట్ మరియు ప్రభుత్వ రవాణా సాధనాల మీద సోమనాథ్ కు చేరుకోవచ్చు.