Click it and Unblock the Notifications
రాంబన్ జిల్లాలోని మెహాద్ వద్ద రాత్రంతా కురిసిన వర్షాలకు ముడ్ స్లైడ్స్, బనిహాల్ సమీపంలోని టబెలా చమల్ వాస్ వద్ద కొండచరియలు విరిగిపడటంతో జమ్మూ-శ్రీనగర్ జాతీయ రహదారి (NH-44) ఈరోజు (ఆగస్టు 24) పూర్తిగా బంద్ అయిందని పోలీసులు తెలిపారు. ప్రస్తుతం రోడ్డుపై పడిన శిథిలాలను తొలగించే పనులు శరవేగంగా జరుగుతున్నాయి. అయితే మధ్యమధ్యలో వాహనాల రాకపోకలకు ఆటంకాలు ఏర్పడే అవకాశముంది. ఈ నేపథ్యంలో శ్రీనగర్, కాశ్మీర్ పర్యటనకు బయలుదేరే పర్యాటకులు ఈ ఉదయం తమ ప్రయాణాలను కాస్త వాయిదా వేసుకోవడం మంచిది. రహదారి పునరుద్ధరణ అప్డేట్స్ తెలుసుకున్నాకే ప్రయాణం ప్రారంభించాలని అధికారులు సూచిస్తున్నారు.
కాశ్మీర్ లోయను అనుసంధానించే ఏకైక ఆల్-వెదర్ రోడ్డు ఇదే కావడం, ఇటీవల తరచూ మూతపడుతుండటంతో రాకపోకలకు తీవ్ర విఘాతం కలుగుతోంది. గత కొన్ని రోజులుగా పడుతున్న వర్షాల కారణంగా రాంబన్, ఉధంపూర్ జిల్లాల్లో కిలోమీటర్ల మేర వాహనాలు నిలిచిపోయాయి. ఈ క్రమంలో సోషల్ మీడియాలో వచ్చే వదంతులను నమ్మవద్దని, కేవలం అధికారిక ట్రాఫిక్ కంట్రోల్ యూనిట్లు (TCU) ఇచ్చే సమాచారాన్ని మాత్రమే ప్రామాణికంగా తీసుకోవాలని అధికారులు ప్రయాణికులను కోరుతున్నారు. ఇంజనీరింగ్ టీమ్లు రహదారిని సురక్షితంగా పునరుద్ధరించిన తర్వాతే వాహనాలను దశలవారీగా అనుమతిస్తారు.
జమ్మూ-శ్రీనగర్ NH-44 లైవ్ స్టేటస్.. ప్రత్యామ్నాయ మార్గాలు ఇవే
మీరు రాంబన్కు దక్షిణ వైపున ఉన్నట్లయితే.. ఉధంపూర్ లేదా జమ్మూలోనే వేచి ఉండటం మంచిది. అక్కడ వసతులు, ఇతర సౌకర్యాలు త్వరగా అందుబాటులోకి వస్తాయి. ఒకవేళ ఉత్తర వైపు ఉంటే, బనిహాల్ లేదా శ్రీనగర్ పరిసరాల్లోనే ఆగిపోవడం సురక్షితం. పోలీసులు స్పష్టమైన అనుమతి ఇచ్చిన తర్వాతే స్థానిక రోడ్లపై ముందుకు సాగండి. రాత్రి వేళల్లో డ్రైవింగ్ చేయడం, కొండరాళ్లు జారే ప్రమాదమున్న (షూటింగ్ స్టోన్స్) ప్రాంతాల గుండా వెళ్లడం అస్సలు చేయవద్దు. ఒకవేళ ప్రయాణంలో ఆలస్యమైతే ఇబ్బంది పడకుండా సరిపడా మంచి నీళ్లు, స్నాక్స్, రెయిన్ కోట్లు, అవసరమైన మందులు, కొద్దిగా నగదును వెంట ఉంచుకోండి.
చారిత్రాత్మక మొఘల్ రోడ్డు (Mughal Road) ద్వారా వెళ్లాలని ఆలోచిస్తున్నారా? అయితే అక్కడ వాతావరణ పరిస్థితులు, కాన్వాయ్ నిబంధనలపైనే ప్రయాణం ఆధారపడి ఉంటుంది. పిర్ కీ గలీ వద్ద ఆగస్టు 20న కొత్తగా కురిసిన మంచు వల్ల ఈ మార్గాన్ని మూసివేశారు. రోడ్డు నిర్వహణ సంస్థ క్లియరెన్స్ ఇచ్చాకే ఇది మళ్లీ తెరుచుకుంటుంది. రాజౌరి-పూంచ్-షోపియాన్ మార్గంలో కేవలం పగటిపూట మాత్రమే, అదీ అధికారుల స్పష్టమైన అనుమతి లభించిన తర్వాతే ప్రయాణానికి పూనుకోండి.
మొఘల్ రోడ్ ప్రత్యామ్నాయం, విమాన-రైలు ప్రయాణాల చిట్కాలు
దక్షిణ వైపున నిలిచిపోయి, అత్యవసరంగా కాశ్మీర్ చేరుకోవాలనుకుంటే.. శ్రీనగర్కు అందుబాటులో ఉన్న చివరి నిమిషం విమాన టికెట్ల వివరాలు చెక్ చేయండి. లేదా జమ్మూ వరకు ఫ్లైట్లో వచ్చి, రోడ్డు మార్గం తెరుచుకునే వరకు వేచి చూడవచ్చు. ఇక ఉత్తర వైపు ఉన్నవారైతే రహదారి తెరుచుకునేలోపు లోయలోనే సైట్సీయింగ్ కొనసాగించవచ్చు. రైలు ప్రయాణికులు జమ్మూ తావి లేదా ఉధంపూర్ వైపు వచ్చే రైళ్ల లభ్యతను పరిశీలిస్తూ, ప్రయాణ సమయానికి కాస్త అదనపు బఫర్ టైమ్ కేటాయించుకోవడం మంచిది.
ప్రయాణానికి సిద్ధమయ్యే ముందు రహదారి స్థితిని ఖచ్చితంగా సరిచూసుకోండి. వివరాల కోసం TCU జమ్మూ: 0191-2459048, TCU రాంబన్: 9419993745, TCU శ్రీనగర్: 0194-2450022 నంబర్లను సంప్రదించవచ్చు. అలాగే తాజా హెచ్చరికల కోసం X (ట్విట్టర్)లో J&K ట్రాఫిక్ పోలీసులను ఫాలో అవ్వండి. శ్రీనగర్, గుల్మార్గ్ లేదా పహల్గామ్లలోని హోటళ్లలో బుకింగ్స్ ఉన్నట్లయితే.. ఉచితంగా తేదీలు మార్చమని గానీ, క్రెడిట్ నోట్ ఇవ్వమని గానీ యాజమాన్యాలను అభ్యర్థించండి. ఆ వివరాలకు సంబంధించిన కన్ఫర్మేషన్లను భద్రపరుచుకోండి.
