కేరళ ట్రిప్ ప్లాన్ చేస్తున్నారా? భారీ వర్షాల వేళ ఈ జాగ్రత్తలు పాటించకపోతే ఇబ్బందే!

కేరళలో ఆగస్టు 14 నుంచి 17 వరకు భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది. ఇడుక్కి, వయనాడ్, ఎర్నాకుళం, అలప్పుళ వంటి ప్రముఖ పర్యాటక ప్రాంతాల్లో జోరుగా వర్షాలు పడుతున్నాయి. దీంతో ఆంధ్రప్రదేశ్, తెలంగాణ నుంచి కేరళ ట్రిప్ ప్లాన్ చేసుకుంటున్న పర్యాటకులు తమ వీకెండ్ ప్లాన్స్‌ను ఒకసారి రీచెక్ చేసుకోవడం మంచిది. సరైన ప్లానింగ్‌తో వెళ్తే ఈ వర్షాకాలంలోనూ కేరళ ప్రకృతి అందాలను, బ్యాక్‌వాటర్స్, హిల్ స్టేషన్లను సురక్షితంగా ఆస్వాదించవచ్చు.

అలెప్పీ, కుమరకోమ్‌లలో హౌస్‌బోట్ ప్రయాణాలపై అధికారులు కఠిన భద్రతా నిబంధనలు అమలు చేస్తున్నారు. ప్రస్తుతం మధ్యాహ్నం 12:00 గంటల నుంచి సాయంత్రం 5:30 గంటల వరకు మాత్రమే బోట్లకు అనుమతి ఉంది. అకస్మాత్తుగా పడే భారీ వర్షాల వల్ల ప్రయాణికుల భద్రతను దృష్టిలో ఉంచుకుని రాత్రి వేళల్లో హౌస్‌బోట్ ప్రయాణాలను పూర్తిగా నిషేధించారు. సరస్సుల్లో ఈదురుగాలులు ఎక్కువగా ఉన్నప్పుడు బోట్లను సురక్షితమైన చిన్న చిన్న కాలువల వైపు మళ్లిస్తున్నారు. కాబట్టి పర్యాటకులు బోట్ యజమానులతో మాట్లాడి, సమాచారం కన్ఫర్మ్ చేసుకున్నాకే జెట్టీల వద్దకు వెళ్లడం మంచిది.

రోడ్డు ప్రయాణాలు, భారీ వర్షాల వేళ సేఫ్ టైమింగ్స్ ఇవే..

కొండ ప్రాంతాల్లో ఎడతెరిపి లేకుండా కురుస్తున్న వర్షాల వల్ల కొండచరియలు విరిగిపడే ప్రమాదం ఉంది. ముఖ్యంగా ఆదిమాలి - మూన్నార్, మూన్నార్ - టాప్ స్టేషన్ మార్గాల్లో వెళ్లేవారు అత్యంత జాగ్రత్తగా ఉండాలి. కోజికోడ్, వయనాడ్‌లను కలిపే తమరస్సేరి ఘాట్ రోడ్డుపై భారీ వాహనాల రాకపోకలను అధికారులు నియంత్రించారు. ఘాట్ రోడ్లలో ప్రయాణించడానికి ఉదయం 7:00 గంటల నుంచి 11:00 గంటల మధ్య సమయం సురక్షితమైనది. మంచు, వర్షం వల్ల విజబిలిటీ తక్కువగా ఉంటుంది కాబట్టి రాత్రి వేళల్లో ప్రయాణాలను అస్సలు చేయకండి.

ఫ్లైట్ ఆలస్యం, రీఫండ్ నిబంధనలపై కీలక సమాచారం

విమానాలు, రైళ్లలో ప్రయాణించే పర్యాటకులు కనీసం 3 గంటల అదనపు సమయాన్ని (బఫర్ టైమ్) ప్లాన్ చేసుకోవడం మంచిది. ప్రతికూల వాతావరణం వల్ల కొచ్చి, కోజికోడ్, త్రివేండ్రం విమానాశ్రయాల్లో సర్వీసులు ఆలస్యమయ్యే అవకాశముంది. సముద్ర అలల తీవ్రత ఎక్కువగా ఉండటంతో బీచ్‌లలో స్విమ్మింగ్‌ను నిషేధించారు. అలాగే వాటర్‌ఫాల్స్ చూసేందుకు వెళ్లే పర్యాటకులు అధికారులు కేటాయించిన సేఫ్టీ వ్యూయింగ్ డెక్స్‌ నుంచే తిలకించాలి. వర్షాల వల్ల ట్రిప్ క్యాన్సిల్ చేసుకోవాల్సి వస్తే.. రీఫండ్ ప్రాసెస్ వేగంగా అయ్యేందుకు హోటల్ బుకింగ్ డాక్యుమెంట్లను సిద్ధంగా ఉంచుకోండి.

హైదరాబాద్, విజయవాడ నుంచి కేరళకు వెళ్లే పర్యాటకులు తగిన జాగ్రత్తలు పాటిస్తే ఎలాంటి ఇబ్బంది లేకుండా ప్రయాణించవచ్చు. కేరళ జిల్లా కంట్రోల్ రూమ్ హెల్ప్‌లైన్ నంబర్ల ద్వారా ఎప్పటికప్పుడు హైవేల పరిస్థితిని తెలుసుకోవచ్చు. వర్షం పడుతున్నా సరే రూఫ్ కవర్ ఉన్న ప్రీమియం హౌస్‌బోట్లను ఎంచుకుంటే హాయిగా ఎంజాయ్ చేయవచ్చు. సరైన సమాచారంతో, ముందస్తు జాగ్రత్తలతో ప్రయాణిస్తే కేరళ వానకాలం సౌందర్యాన్ని సురక్షితంగా వీక్షించవచ్చు.