ఊటీ ట్రిప్ ప్లాన్ చేస్తున్నారా? గూడలూరు బంద్‌తో రూట్ మార్చండి, లేదంటే చిక్కుల్లో పడతారు!

ఊటీ వెళ్లే పర్యాటకులకు బిగ్ అలర్ట్! గూడలూరులో 48 గంటల పాటు రాకపోకలకు తీవ్ర అంతరాయం ఏర్పడనుంది. ఈరోజు, అంటే ఆగస్టు 27 ఉదయం 6 గంటల నుంచి శనివారం (ఆగస్టు 29) ఉదయం 6 గంటల వరకు గూడలూరు బంద్ కొనసాగనుంది. దీంతో గూడలూరు మీదుగా ఊటీని కలిపే జాతీయ రహదారి (NH181) పై వాహనాల రాకపోకలను అడ్డుకునే అవకాశముంది. దుకాణాలు, టాక్సీలు, ఆటోలు కూడా బంద్ కానున్నాయి. కాబట్టి బెంగళూరు, మైసూర్, కేరళ నుంచి ఊటీ బయలుదేరే పర్యాటకులు గూడలూరు రూట్‌ను అస్సలు ఎంచుకోవద్దు. శనివారం ఉదయం బారికేడ్లు తొలగించే వరకు ఈ ప్రభావం ఉండే అవకాశం ఉంది.

పర్యాటకులు ప్రత్యామ్నాయ మార్గాలను ఎంచుకోవడం చాలా ముఖ్యం. ఎందుకంటే, అత్యంత నిటారైన 36 హెయిర్‌పిన్ బెండ్స్ ఉన్న మసినగుడి-కల్హట్టి ఘాట్ రోడ్డులోకి పర్యాటక వాహనాలను నీలగిరి జిల్లా యంత్రాంగం ఏప్రిల్ నుంచే నిషేధించింది. టూరిజం బోర్డు సమాచారం ప్రకారం, కల్హట్టి గేటును సూర్యాస్తమయం సమయానికి మూసివేస్తారు. అలాగే బందీపూర్, ముదుమలై అటవీ మార్గాల్లో రాత్రి 9 గంటల నుంచి ఉదయం 6 గంటల వరకు వాహనాలకు అనుమతి ఉండదు. ముదుమలైలో స్టే చేసేవారు సాయంత్రం 6:30 గంటలలోపే తెప్పకాడు చెక్‌పోస్ట్ వద్దకు చేరుకోవాల్సి ఉంటుంది. తదుపరి ఉత్తర్వులు వచ్చే వరకు కల్హట్టి మార్గం అందుబాటులో ఉండదని గుర్తుంచుకోండి.

బెంగళూరు, మైసూర్, కేరళ నుంచి ఊటీకి సురక్షితమైన ప్రత్యామ్నాయ మార్గాలు

బెంగళూరు నుంచి వచ్చే పర్యాటకులు సేలం, అవినాశి, మెట్టుపాళయం, కునూర్ మీదుగా ఊటీ చేరుకోవచ్చు. మైసూర్ నుంచి అత్యవసరంగా ప్రయాణించాల్సి వస్తే.. చామరాజనగర్, సత్యమంగళం, మెట్టుపాళయం, కునూర్ మార్గాన్ని ఎంచుకోండి. ఇక వయనాడ్ లేదా నిలంబూర్ నుంచి వచ్చేవారు పాలక్కాడ్, కోయంబత్తూర్, మెట్టుపాళయం, కునూర్ రూట్‌లో వెళ్లవచ్చు. ఈ మార్గాల్లో బంద్ ప్రభావం ఉండదు. అంతేకాకుండా ఆహారం, పెట్రోల్ బంకులు, పోలీస్ పెట్రోలింగ్ వంటి సౌకర్యాలు అందుబాటులో ఉంటాయి. ఈ రూట్లలో ప్రయాణానికి కాస్త ఎక్కువ సమయం పడుతుంది, టోల్‌గేట్లు కూడా ఎక్కువగానే ఉంటాయి. కాబట్టి ఫాస్ట్‌ట్యాగ్‌లో తగినంత బ్యాలెన్స్ ఉంచుకోవడంతో పాటు కొంత నగదు చేతిలో ఉంచుకోవడం మంచిది. వర్షాల వల్ల కొండల్లో వాతావరణం తేమగా ఉంటుంది కాబట్టి, ప్రయాణ సమయాన్ని కాస్త ఎక్కువగా ప్లాన్ చేసుకోండి.

గూడలూరు బంద్: బస్సు సర్వీసులు, చెక్‌పోస్టుల సమాచారం

బంద్ కారణంగా గూడలూరు వైపు వెళ్లే ప్రభుత్వ బస్సుల సర్వీసులు రద్దయ్యే లేదా మళ్లించే అవకాశముంది. కాబట్టి ప్రయాణమయ్యే ముందే తమిళనాడు (TNSTC ఊటీ రీజియన్), కేరళ (KSRTC) బస్సుల వేళలను సరిచూసుకోండి. NH181లో రోడ్డు దిగ్బంధనాలు, ప్రత్యామ్నాయ మార్గాల సమాచారం కోసం నీలగిరి పోలీసు హెల్ప్‌లైన్‌ను సంప్రదించవచ్చు. అటవీ, జిల్లా చెక్‌పోస్టుల వద్ద ప్రదర్శించడానికి టికెట్లు, గుర్తింపు కార్డులు, హోటల్ బుకింగ్ ప్రూఫ్‌లను సిద్ధంగా ఉంచుకోండి. కొండలపై ఇంధన కొరత ఎదురవ్వకుండా ఉండేందుకు బయలుదేరే ముందే మైదాన ప్రాంతాల్లోనే పెట్రోల్/డీజిల్ నింపుకోవడం శ్రేయస్కరం.

వర్షాకాలంలో కొండల్లో డ్రైవింగ్: జాగ్రత్తలు, వెంట తీసుకెళ్లాల్సినవి

బందీపూర్-ముదుమలై అటవీ రహదారులను రాత్రి 9 నుంచి ఉదయం 6 వరకు మూసివేస్తారు కాబట్టి, ప్రయాణాన్ని తెల్లవారుజామునే ప్రారంభించండి, చీకటి పడేవరకు ఆగవద్దు. మీ వెంట రెయిన్‌కోట్లు, వెచ్చని దుస్తులు, గ్లాస్‌లు శుభ్రం చేసే యాంటీ-ఫాగ్ క్లాత్, టార్చ్ లైట్, ఫుల్ ఛార్జింగ్ ఉన్న పవర్ బ్యాంక్‌లను తప్పక ఉంచుకోండి. నెట్‌వర్క్ సమస్యల కోసం ఆఫ్‌లైన్ మ్యాప్‌లను డౌన్‌లోడ్ చేసుకోండి. మీ లైవ్ లొకేషన్‌ను కుటుంబ సభ్యులతో పంచుకోండి. నడువట్టం సమీపంలో పొగమంచు, కొండచరియలు విరిగిపడే ప్రమాదం ఉన్నందున డ్రైవింగ్ పట్ల అప్రమత్తంగా ఉండండి. షార్ట్‌కట్ అనిపించినప్పటికీ, నిషేధం ఉన్న కల్హట్టి మార్గంలో వెళ్లే సాహసం అస్సలు చేయకండి.