Click it and Unblock the Notifications
2026 ఆగస్టు 31: వారణాసిలో గంగానది ఉగ్రరూపం దాలుస్తోంది. ఆదివారం మధ్యాహ్నానికి నది నీటిమట్టం 69.26 మీటర్లకు చేరింది. ఇక్కడి ప్రమాదకర స్థాయి అయిన 70.26 మీటర్ల మార్క్కు అతి సమీపంలోకి ప్రవాహం చేరుకుంది. మరోవైపు, తూర్పు ఉత్తరప్రదేశ్లో ఈరోజు మరిన్ని వర్షాలు కురిసే అవకాశముందని భారత వాతావరణ శాఖ (IMD) హెచ్చరించింది. దీంతో ఘాట్ల సందర్శన, గంగా హారతి ప్రదేశాలు, పడవల రాకపోకలపై అధికారులు వెంటవెంటనే మార్గదర్శకాలు జారీ చేస్తున్నారు. నీటిమట్టాల ఆధారంగా జిల్లా యంత్రాంగం ఎప్పటికప్పుడు తాజా సమాచారాన్ని చేరవేస్తోంది.
దశాశ్వమేధ్తో పాటు దిగువన ఉన్న ఘాట్లలోని కింది మెట్లు పూర్తిగా మునిగిపోయాయి. దీంతో ఒక ఘాట్ నుంచి మరో ఘాట్కు వెళ్లే దారులు మూతపడ్డాయి. రాత్రి వేళ భక్తుల భద్రత దృష్ట్యా ప్రసిద్ధ దశాశ్వమేధ గంగా హారతిని ఎత్తైన ప్రదేశానికి మార్చారు. నదిలో ప్రవాహం పెరగడంతో పడవల రాకపోకలను నిలిపివేసి, నగరం అంతటా తనిఖీలను తీవ్రతరం చేశారు. సాయంత్రం వేళల్లో భద్రతా సిబ్బంది గస్తీ, బారికేడ్లు, నిరంతర మైక్ అనౌన్స్మెంట్లు ఉంటాయి.
కాశీ విశ్వనాథుని దర్శనం, కారిడార్ ఎంట్రీ వివరాలు
కాశీ విశ్వనాథ ఆలయంలోని గంగా ద్వారం కారిడార్ ద్వారా ప్రతిరోజూ ఉదయం 6 గంటల నుంచి రాత్రి 9 గంటల వరకు భక్తులను అనుమతిస్తున్నారు. స్థానికుల క్యూ లైన్ల భారాన్ని తగ్గించేందుకు 'కాశీ ద్వార్' ద్వారా రోజంతా ప్రవేశం కల్పించారు. తక్కువ సమయంలో దర్శనం పూర్తి చేసుకోవాలనుకునే భక్తులు అధికారిక 'కాశీ పాస్' ద్వారా నిర్దేశిత స్లాట్లను బుక్ చేసుకోవచ్చు. ఇక విలువైన వస్తువులను వీలైనంత తక్కువగా తెచ్చుకోవడం మంచిది. వారాంతాల్లో లాకర్ల కోసం దర్శనం క్యూ కంటే ఎక్కువ సమయం వేచి ఉండాల్సి రావచ్చు.
గంగా హారతి ప్రదేశం మార్పు.. తిలకించే స్థలాలు ఇవే!
నదిలో నీటిమట్టం పెరగడంతో ఈ నెలలో గంగా హారతి వేదికను దాదాపు 10 అడుగుల పైకి జరిపారు. ఆగస్టు 17న సాయంత్రం ప్రవాహం ఒక్కసారిగా పెరగడంతో నిర్వాహకులు హారతిని ఏకంగా ట్రస్ట్ భవనం టెర్రస్పై నిర్వహించాల్సి వచ్చింది. ప్రస్తుతం పైమెట్ల పైనుంచే హారతిని చూడటానికి అనుమతిస్తున్నారు. పరిమిత సీటింగ్, బారికేడ్ల నడుమ భక్తులకు కట్టుదిట్టమైన ఏర్పాట్లు చేశారు. నది భద్రతా నియమాలు అమలులో ఉన్నందున పడవల నుంచి హారతిని తిలకించడాన్ని తాత్కాలికంగా రద్దు చేశారు.
బోట్లు, క్రూయిజ్ సర్వీసులపై ఆంక్షలు.. రీఫండ్ వివరాలు
వరద ఉధృతి కారణంగా నగరం అంతటా పడవల ప్రయాణాన్ని నిలిపివేశారు. భక్తులు ఎలాంటి బుకింగ్లు చేసుకునే ముందు తాజా పరిస్థితులను సరిచూసుకోవడం మంచిది. బోట్ నిర్వాహకులు ఖచ్చితంగా లైఫ్ జాకెట్లు వాడాలని, ప్రయాణికుల సంఖ్యను తగ్గించాలని అధికారులు ఆదేశించారు. లేదంటే బోట్లను సీజ్ చేయడంతో పాటు భారీ జరిమానాలు విధిస్తారు. క్రూయిజ్ నిర్వాహకులు పగటిపూట స్లాట్లను ప్రకటిస్తున్నప్పటికీ, ప్రవాహం ఎక్కువగా ఉన్నప్పుడు ప్రయాణాలను వాయిదా వేస్తున్నారు. అలాంటి సమయంలో నిర్వాహకులను సంప్రదించి రీబుకింగ్ చేసుకోవచ్చు. కేవలం అధికారిక జెట్టీల నుంచే బోట్లు ఎక్కండి, వరద నీరు ఉన్న జారే తాత్కాలిక మెట్లపైకి వెళ్లకపోవడమే మంచిది.
ట్రాఫిక్ ఆంక్షలు, పార్కింగ్, హెల్ప్లైన్ నంబర్లు
రద్దీని నివారించేందుకు దశాశ్వమేధ్-గోదౌలియా మార్గంలో పాదచారులను మాత్రమే అనుమతిస్తున్నారు. ద్విచక్ర వాహనాలను గోదౌలియా మల్టీ లెవల్ పార్కింగ్లో నిలిపివేసి.. అక్కడి నుంచి కాలినడకన లేదా ఈ-రిక్షాల్లో ముందుకు వెళ్ళవచ్చు. ఇరుకు సందుల్లో ట్రాఫిక్ చిక్కులు తప్పించుకోవడానికి గోదౌలియా లేదా మైదాగిన్ సమీపంలోని వాహన నిలయాలను ఉపయోగించుకోండి. ఏదైనా అత్యవసర పరిస్థితి ఉంటే జిల్లా విపత్తు హెల్ప్లైన్ 9140037137, పోలీసులకు 112, లేదా అంబులెన్స్ కోసం 108 నంబర్లను సంప్రదించవచ్చు.
