ముత్తతి కర్నాటక లోని మంద్య జిల్లాలో ఒక గ్రామం. బెంగుళూరు నుండి ప్రయాణ సమయం 90 నిమిషాలు మాత్రమే. మన రామాయణంలో ఈ ప్రదేశాన్ని గురించిన వివరణ కూడా ఇవ్వబడింది. ఈ ప్రదేశంలో ఆంజనేయుడి దేవాలయం ప్రసిద్ధి. దీనినే హనుమంతరాయ దేవాలయం అని కూడా పిలుస్తారు.
ముత్తతి గ్రామం ఎంతో ముచ్చటగా కనపడుతుంది. కావేరి నది ఈ గ్రామంలోని కొండరాతి ప్రదేశం ద్వారా ప్రవహిస్తుంది. చుట్టూ కొండలు, దట్టమైన అడవులతో ప్రకృతి అందాలను దర్శించి ఆనందించేవారికి తమ కలలు నిజమైనట్లు అనిపిస్తుంది. ఈ ప్రదేశంలోని కావేరి ప్రవాహంలో నావలలో ప్రయాణించవచ్చు.
ముత్తతి కావేరి వైల్డ్ లైఫ్ శాంక్చువరీ కి సమీపంలో ఉంది. అన్నీ అడవులే. కొండల మధ్య లోయలు, నదీ ప్రవాహాలు కలిగిన ఈ ప్రదేశంలో వివిధ రకాల వన్య ప్రాణులను అంటే పులులు, చిరుతలు, ఎలుగుబంట్లు, అడవి కుక్కలు, అడవి ఎద్దు, మొదలైనవి చూసి ఆనందించవచ్చు. ముత్తతి భీమేశ్వరికి సమీపంలో ఉంది. ట్రెక్కింగ్ లో మనోహర సుందర అందాలను కన్నుల పండువుగా ఆనందించవచ్చు.
వాస్తవానికి ఇపుడు ఈ ప్రదేశం ట్రెక్కింగ్ చేసేవారికి స్వర్గంగా మారిపోతోంది. దట్టమైన ఈ అడవులలో ట్రెక్కింగ్ చేయాలంటే, ముందుగా అటవీ శాఖ అనుమతి పొందాలి. ముత్తి సమీపంలోని సొలిగెరె హిల్ సముద్ర మట్టానికి 1125 మీటర్ల ఎత్తులో ఉండి దానిపైకి అధిరోహించిన వారికి చుట్టు పట్ల ప్రాంతాలను ఎంతో మనోహరంగా చూపిస్తుంది. ఇక్కడి అడవి నుండి ట్రెక్కింగ్ లో భీమేశ్వరి, సంగమా ప్రదేశాలను కూడా చేరవచ్చు.
ఈ ప్రదేశాన్ని బెంగుళూరు నివాసితులు, తరచుగా సందర్శించి అక్కడి మనోహర సుందర దృశ్యాలను ఆనందిస్తారు. బెంగుళూరు నగర ప్రజలకు వారంతపు సెలవుల విశ్రాంతి ప్రదేశంగా కూడా అనుకూలమే.