స్వాతంత్ర్య దినోత్సవం: బెంగళూరులో ట్రాఫిక్ ఆంక్షలు.. వీకెండ్ ట్రిప్ ప్లాన్ చేస్తున్నారా? ఈ టిప్స్ మీకోసమే!

స్వాతంత్ర్య దినోత్సవ వేడుకల (పరేడ్) నేపథ్యంలో బెంగళూరు నగరంలోని ప్రధాన ప్రాంతాల్లో భారీగా ట్రాఫిక్ ఆంక్షలు విధించనున్నారు. లాంగ్ వీకెండ్ ఎంజాయ్ చేయాలనుకునే వారు ట్రాఫిక్ కష్టాల నుంచి తప్పించుకోవాలంటే తెల్లవారుజామునే బయల్దేరడం మంచిది. ముఖ్యంగా సన్‌రైజ్ ట్రిప్స్ ప్లాన్ చేసుకునే వారు కాస్త ముందుచూపుతో వ్యవహరించాలి. కరెక్ట్ టైమ్‌కి బయల్దేరకపోతే గంటల తరబడి ట్రాఫిక్ జామ్‌లో చిక్కుకుపోవడం ఖాయం. నగరంలో రోడ్లు మూసేయక ముందే హైవేల వైపు ప్రయాణం సాగించడం ఉత్తమం.

బెంగళూరు సిటీ ట్రాఫిక్ పోలీసులు ఉదయం 8 గంటల నుంచి 11 గంటల వరకు ట్రాఫిక్ ఆంక్షలు అమలు చేయనున్నారు. పరేడ్ గ్రౌండ్స్ పరిసర ప్రాంతాలైన కబ్బన్ రోడ్, దాని చుట్టుపక్కల రోడ్లపై ఈ ప్రభావం ఎక్కువగా ఉంటుంది. మెట్రో సర్వీసులు యథావిధిగా నడుస్తాయి కానీ, లోకల్ బస్సుల సర్వీసులను భారీగా తగ్గించనున్నారు. కాబట్టి, ఉదయం పూట సెంట్రల్ బిజినెస్ డిస్ట్రిక్ట్ (CBD) వైపు వెళ్లకుండా ఉండటమే మంచిది. ప్రయాణం సాఫీగా సాగాలంటే వీలైనంత త్వరగా ఎక్స్‌ప్రెస్‌వేల వైపు వెళ్లడం బెటర్.

నంది హిల్స్, శివనసముద్ర, స్కందగిరి వెళ్లే వారు ఎప్పుడు బయల్దేరాలి?

నంది హిల్స్ వెళ్లాలనుకునే వారు ఉదయం 6 గంటల లోపే హెబ్బాల్ ఫ్లైఓవర్ దాటేయాలి. అప్పుడే కింద గేట్ వద్ద ఎలాంటి ఇబ్బంది లేకుండా ఎంట్రీ టికెట్లు దొరుకుతాయి. ఇక స్కందగిరి సన్‌రైజ్ ట్రెక్కింగ్ కోసం తెల్లవారుజామున 3:30 నుంచి 4:30 గంటల మధ్య బయల్దేరడం మంచిది. అయితే, ఇక్కడికి వెళ్లేందుకు ఆన్‌లైన్‌లో ముందే అఫీషియల్ పర్మిట్లు బుక్ చేసుకోవడం తప్పనిసరి. శివనసముద్ర వెళ్లే వారు నైస్ (NICE) ఎక్స్‌ప్రెస్‌వే ద్వారా ఉదయం 5:30 గంటల లోపే చేరుకోవాలి. దీనివల్ల సెలవు రోజుల్లో వచ్చే భారీ రద్దీ నుంచి తప్పించుకోవచ్చు.

బెంగళూరు ఐ-డే పరేడ్ ఆంక్షలు: వాతావరణ అప్‌డేట్స్, ప్రత్యామ్నాయ మార్గాలు

ప్రయాణానికి ముందే భారత వాతావరణ శాఖ (IMD) హెచ్చరికలను ఒకసారి చెక్ చేసుకోండి. వర్షాల వల్ల ఘాట్ రోడ్లు జారే ప్రమాదం ఉంది, అలాగే ట్రెక్కింగ్ మార్గాలు బురదమయంగా మారే అవకాశం ఉంది. కాబట్టి తేలికపాటి రెయిన్‌కోట్లు, మంచి గ్రిప్ ఉన్న షూస్ వెంట తీసుకెళ్లడం మంచిది. ఒకవేళ ఆన్‌లైన్ పర్మిట్లు దొరకకపోతే.. ప్రత్యామ్నాయంగా దేవరాయనదుర్గ లేదా అంతరగంగ వంటి అందమైన హిల్ స్టేషన్లను ఎంచుకోవచ్చు. ఎలాంటి రిజిస్ట్రేషన్ అవసరం లేని అవలబెట్ట కూడా ఒక అద్భుతమైన ఆప్షన్.

తిరుగు ప్రయాణంలో కూడా ట్రాఫిక్ జామ్‌లలో చిక్కుకోకుండా ప్లాన్ చేసుకోండి. మధ్యాహ్నం 12:30 నుంచి 3:30 గంటల మధ్య తిరుగు ప్రయాణం కావడం వల్ల ట్రాఫిక్ ఇబ్బందులు ఉండవు. లేదా రాత్రి 8 గంటల తర్వాత బెంగళూరుకు చేరుకునేలా ప్లాన్ చేసుకోండి. సరైన ప్లానింగ్‌తో వెళ్తే ఎలాంటి ట్రాఫిక్ టెన్షన్ లేకుండా హ్యాపీగా వీకెండ్ ఎంజాయ్ చేయవచ్చు. కాబట్టి, కాస్త త్వరగా ప్లాన్ చేసుకుని మీ స్వాతంత్ర్య దినోత్సవ వీకెండ్‌ను మరింత స్పెషల్‌గా మార్చుకోండి.