మకర సంక్రాంతి - ధాన్యాగార పండుగల వేడుక !

కర్నాటక లో ఎలా ?

ప్రతి సంవత్సరం జనవరి లో వచ్చే ఈ పండుగను కర్నాటక రాష్ట్రంలో 'సుగ్గి' లేదా పంటల పండుగ గా జరుపుకుంటారు. ఈ రోజున యువతులు కొత్త దుస్తులు ధరించి ఒక ప్లేట్ లో నువ్వులు, కొబ్బరి, వేరు శనగ, బెల్లం , చెరుకు గడ ముక్కలు, పటిక బెల్లం ల వంటివి వుంచి సన్నిహిత, బంధుత్వ కుటుంబాలకు పంచుతారు. తాము కూడా వాటిని పుచ్చుకుంటారు. దీనిని 'ఎళ్ళు బిరోదు' అని అంటారు.

బీహార్ లో ఎలా ?

సంక్రాంతి పండుగను బీహార్ లో తిల సంక్రాంతి అంటారు. ప్రజలు నదులు, చెరువులలో స్నానాలు చేసి, ఇంటిలో కొత్త పంటల నుండి వచ్చిన రైస్, బెల్లం నువ్వులు వంటి వాటితో పిండి వంటలు చేసి కొని , తిని కుటుంబ సభ్యులందరూ ఒక చోట చేరి ఆనందిస్తారు. కూరగాయలు, రైస్, బటానీలు, బంగాళా దుంపలు వంటివి కలిపి వండి కిచిడి గా తిని ఆనందీస్తారు. అగ్నిలో కొన్ని నువ్వులు వేసి అగ్ని ఆహుతి చేస్తారు.

పంజాబ్ లో ఎలా

ఈ పండుగను పంజాబ్ లో లోహరి అనే పేరుతో చేస్తారు. కొత్త పంటలను ఇంటికి చేరుస్తారు. భోగి మంటలు వేసి, స్వీట్ లు, చెరకు గడలు, బియ్యం, వంటివి ఆ మంటలలో వేస్తారు.

రెండవ రోజు పండుగ

పంజాబ్ లో రెండవ రోజు పండుగను మాఘి లేదా మాఘ మాస మొదలు గా చెపుతారు. ఈ రోజున పాయసం వంటివి తిని ఆనందిస్తారు. నదులలో పవిత్ర స్నానాలు చేస్తారు. స్నేహితులు, బంధువులు తో కలసి అభినందనలు తెలుపు కుంటూ బహుమతులు ఇచ్చి పుచ్చుకుంటారు.

అస్సాం లో ఎలా ?

అస్సాం లో ఈ పండుగను భోగాలి బిహు లేదా మాఘ బిహు అంటారు. భోగ అంటే తినటం, ఆనందించటం. కొత్త పంటలు రావటం ధాన్యాగారాలు నిండటం తో ఒక విందు వలే ఈ పండుగ చేస్తారు. బిహు పండుగ రోజున యువతులు పొలాలకు వెళ్లి అక్కడి గడ్డి, వెదురు బొంగులతో తాత్కాలిక పాకలు వంటివి వేసి అక్కడే వంటలు చేసి, తిని, నిద్రించి వాటిలో ఆనందిస్తారు. రాత్రి వంటలలో మాంసాహారం, చేపలు ప్రత్యేకం.

అస్సాం లో భోగాలి బిహు

ఉదయంవేళ భోగి మంటలు వేసి స్నానాలు చేస్తారు. భోగి మంటల బూడిదను పొలాలలో, తోటలలో పంటలు బాగా పండా లంటూ చల్లుతారు. బియ్యపు రొట్టెలు తింటారు. డ్రమ్ములు వాయిస్తూ పాటలు పాడతారు. వివిధ రకాల ఆటలు ఆడతారు.

తమిళనాడు లో ఎలా ?

తమిళనాడు లో ఈ పండుగను తాయ్ పొంగల్ అంటారు. ఇక్కడ ఈ ధాన్యపు పంటల పండుగ నాలుగు రోజులు చేస్తారు. నాలుగు రోజులలోను రెండవ రోజు ప్రధాన పండుగ.

తమిళనాడు లో తాయి పొంగల్

పొంగల్ పండుగ రెండవ రోజున సూర్యోదయం సమయంలో బియ్యం, పాలు కలిపి పొంగించి పొంగలి తయారు చేస్తారు. పొంగలి పొంగినట్లు తమ ఇంటి ఐశ్వర్యం అభివృద్ధి చెందాలని తలుస్తారు.

గుజరాత్ లో ఎలా ?

గుజరాత్ లో ఈ పండుగను ఉత్తరాయన్ అంటారు. కొత్త ధాన్యాల పండుగగా ఆచరిస్తారు. ఈ పండుగ కు ఇక్కడ గాలి పటాలను ఎగుర వేయటం ఒక ప్రత్యేకత. గాలిపటాల దుకాణాలు అహమదాబాద్ నగరంలో, ఈ ఉత్తరాయణ వారంలో ఇరవై నాల్గు గంటలూ అధిక వ్యాపారం చేస్తాయి.

గుజరాత్ లో ఉత్తరాయన్ పండుగ

గుజరాత్ రాష్ట్రంలో ప్రజలు ఈ పండుగ రోజున పగటి పూట రక రకాల పిండి వంటలు చేసుకుని తిని ఆనందిస్తారు. పగటి పూట రంగు రంగుల గాలిపటాలు ఎగురవేస్తారు. రాత్రి వేళలో సైతం, వెలుగులు విరజిమ్మే గాలిపటాలను ఎగుర వేస్తారు. ఇక్కడ చేసే ఈ గాలి పటాల పండుగ వేడుక ప్రపంచ వ్యాప్తంగా పేరొందినది.