Click it and Unblock the Notifications
ఫిబ్రవరి నెల ముగుస్తోంది. ఉష్ణోగ్రతలు క్రమంగా పెరుగుతూ ఉన్నాయి. వేసవి వేడి మిమ్మల్ని తీవ్రంగా తాకడానికి ముందు రిఫ్రెష్ ప్రయాణాన్ని ప్రారంభించడానికి ఇది సరైన సమయమనే చెప్పాలి. విశాఖపట్నం లేదా దాని పరిసర ప్రాంతాలలో ఉన్నవారు, మండుతున్న వేసవికి ముందు సంతోషకరమైన అనుభవాన్ని పొందేందుకు వైజాగ్ నుండి కొన్ని వారాంతపు విడిది కేంద్రాలు ఇక్కడ అందుబాటులో ఉన్నాయి. అక్కడి విశేషాలేంటో చూద్దాం.
అనంతగిరి కొండలు
తూర్పు కనుమలలో నెలకొని ఉన్న అనంతగిరి కొండలు విశాఖపట్నం నుండి అతి కొద్ది దూరంలోనే ఉంటాయి. ఈ కొండలు ప్రశాంతతకు మారుపేరుగా నిలుస్తాయి. ఈ ప్రాంతమంతా దట్టమైన పచ్చదనంతో నిండి ఉంటుంది. ఇక్కడి చల్లని గాలి, ప్రశాంతమైన వాతావరణం పర్యాటకుల ఎంతగానో ఆకట్టుకుంటుంది. కాఫీ తోటల గుండా తీరికగా షికారు చేయండి. ఇక్కడి స్వచ్ఛమైన గాలిని పీల్చుతూ కుటుంబంతో సరదాగా గడిపేయొచ్చు. ట్రెక్కింగ్ చేయాలనుకునేవారికి ఈ ప్రదేశం ఉత్తమమనే చెప్పుకోవాలి.
వంజంగి
వంజంగి విశాఖపట్నంలోని శీతాకాలపు హాట్స్పాట్గా మారింది. ఈ సీజన్లో ఇక్కడి అందాలు మరింత అందాన్ని సంతరించుకుంటాయి. చుట్టూ కొండలు లోయలు, వాటికి దట్టమైన అడవులు, ఆ ఆడవుల్లో పచ్చని చెట్లు, ఆ పచ్చని చెట్లపై పొంగమంచు అందాలు ఇక్కడి సొంతం. ఇది పాడేరు గిరిజన ప్రాంతంలో ఉండే ఈ అద్భుతమైన టూరిస్ట్ స్పాట్. ఇది శీతాకాలంలో తప్పక సందర్శించాల్సిన ప్రదేశం. ఆ టూరిస్ట్ స్పాట్ గురించి మరింత సమాచారం. సముద్ర మట్టానికి సుమారు 3,400 అడుగుల ఎత్తులో ఉండే ఈ అందమైన హిల్స్టేషన్ ట్రెక్కింగ్ ప్రియులకు ఎంతో ఉత్తమం. ఈ వంజంగి హిల్స్పై నుంచి సూర్యోదయం చూడటం అద్భుతంగా ఉంటుంది. దీనిని మేఘాల కొండ అని కూడా పిలుస్తారు.
లంబసింగి
ఆంధ్రప్రదేశ్ కాశ్మీర్గా పిలవబడే లంబసింగి దాని చల్లని వాతావరణంతో పర్యాటకులకు ప్రత్యేకమైన అనుభూతిని అందిస్తుంది, అందమైన, దట్టమైన అటవీ ప్రాంతంలో ఉంటుంది. ఇది తూర్పు కనుమలలో 1025 మీటర్ల ఎత్తులో ఉంటుంది. లంబసింగి చిన్న ఆపిల్, స్ట్రాబెర్రీ పొలాలతో పాటు టీ మరియు కాఫీ తోటలకు ఎంతో ప్రసిద్ధి చెందింది. వీటితోపాటు ఈ ప్రదేశం వివిధ రకాల వన్యప్రాణులు, వృక్షజాలం, జంతుజాలంతో సమృద్ధిగా ఉంటుంది. ఈ ప్రాంతం గతంలో దట్టమైన అడవులతో కప్పబడి ఉండేది. ఇక్కడికి సమీపంలోని తాజంగి రిజర్వాయర్ వద్ద జిప్ లైనింగ్ను కూడా ఆస్వాదించొచ్చు. రాత్రిపూట క్యాంపింగ్ చేయాలనుకునేవారికి కూడా ఇది గొప్ప ప్రదేశం.
డియోమాలి
తూర్పు కనుమలలోని ఎత్తైన శిఖరం డియోమాలి. సాహసప్రియులకు, ప్రకృతిప్రేమికులకు ఈ ప్రాంతం ఎంతో అనువైనది. ఎగువ నుండి విశాల దృశ్యాలు ఎంతో ఉత్కంఠభరితంగా ఉంటాయి. రొటీన్ లైఫ్ నుంచి కాస్త రిఫ్రెష్ కోసం వచ్చేవారు తప్పకుండా ఈ ప్రాంతాన్ని ఆస్వాదించాల్సిందే. ఈ ప్రాంతంలో ట్రెక్కింగ్ కూడా చేయొచ్చు. వైజాగ్ నుండి సుమారు 165 కిలోమీటర్ల దూరంలో ఈ ప్రాంతం ఉంటుంది. ఇది సముద్ర మట్టానికి 1672 మీటర్ల ఎత్తులో ఉన్న అందమైన వారాంతపు విహార ప్రదేశం.
మారేడుమిల్లి
తూర్పుగోదావరి జిల్లాలోని దట్టమైన అడవులలో ఉన్న మారేడుమిల్లి ప్రకృతి ప్రేమికులకు స్వర్గధామంగా ఉంది. ఈ ప్రదేశంలో సుందరమైన మార్గాలు, జలపాతాలు మరియు ప్రశాంతమైన వాతావరణం ఉంటుంది. గిరిజన సంస్కృతిని ప్రత్యక్షంగా చూడాలనుకునేవారు తప్పకుండా ఈ ప్రాంతానికి రావాల్సిందే. ఇక్కడి జలతరంగిణి జలపాతాన్ని కూడా సందర్శించొచ్చు. మారేడుమిల్లి అందించే ప్రశాంతతను ఇక్కడ ఆస్వాదించండి. ఈ ప్రాంతం వర్షాకాల విహార ప్రదేశంగా ప్రసిద్ధి చెందినప్పటికీ, అన్ని సీజన్లలో ఈ ప్రాంతాన్ని సందర్శిస్తుంటారు. ఇది వైజాగ్ నుండి సుమారు 222 కిలోమీటర్ల దూరంలో ఉంటుంది.
