శివుడికి ఉన్న ఈ రూపాల గురించి మీకు తెలుసా?

ఆకాశభైరవ దేవాలయం

P.C: You Tube

శివుడి విశేష రూపమే భైరవ రూపం. ఇందులో కూడా విభిన్న రూపాలు ఉన్నాయి. అందులో ఆకాశభైరవ రూపం విశిష్టమైనది. ఈ ఆకాశ భైరవ రూపాన్ని అత్యంత విశిష్టమైనదిగా ఆరాధిస్తారు. ఈ దేవాలయం నేపాల్‌ రాజధాని ఖాట్మాండులో ఉంది. ఆగస్టు నుంచి డిసెంబర్ మధ్యకాలంలో ఇక్కడ విశిష్ట పూజలు జరుగుతాయి. ఈ సమయంలో ఆకాశభైరవుడిని ఊరేగిస్తారు.

అర్థనారీశ్వర లింగం

P.C: You Tube

ఆ మహాశివుడు తన శరీరంలో సగభాగాన్ని తన భార్య అయిన పార్వతీదేవికి ఇచ్చి అర్థనారీశ్వరుడిగా పేరు తెచ్చుకొన్నారు. అంటే శరీరంలో సగభాగం పురుషుడి రూపంలో ఉండగా సగభాగం స్త్రీ రూపంలో ఉంటుంది. ఈ అర్థనారీశ్వరుడికి మనదేశంలో చాలా తక్కువ చోట్ల ఆలయాలు ఉన్నాయి. అందులో ముఖ్యమైనది తమిళనాడులోని నామక్కల్ జిల్లాలోని తిరుచెంగూడ అనే చిన్న గుట్ట పై ఉన్న దేవాలయం.

అష్టమూర్తి దేవాలయం

P.C: You Tube

భారతదేశంలోని వేదాలను అనుసరించి శివుడు కొన్ని విశేష గుణగణాలను కలిగి ఉన్నారు. అందులో ఎనిమిది లక్షణాలు ముఖ్యమైనవి. ఆ ఎనిమిది లక్షణాలు ఒకే మూర్తిలో ఉండటం చాలా అరుదైన విషయం. అటువంటి మూర్తినే అష్టమూర్తి శివుడు అని అంటారు. ఈ విశిష్ట రూపంలో ఉన్న శైవ దేవాలయం చత్తీస్‌ఘడ్ రాష్ట్రంలోని జంజగీర్-చంపా జిల్లాలోని ఖరూద్ అనే పట్టణంలో ఉంది.

కాళభైరవ దేవాలయం

P.C: You Tube

కాళభైరవ రూపం శివుడి ఒక ఉగ్రస్వరూపం. ఒకసారి బ్రహ్మ తానే త్రిమూర్తుల్లో అధికుడని విర్రవీగుతాడు. అంతేకాకుండా పరమశివుడు చేసే ప్రతి పనికి అడ్డుతగలడం మొదలుపెడుతారు. దీంతో స`ష్టికార్యం అస్తవ్యస్తం అవుతుంది. దీంతో కోపగించుకొన్న శివుడు తన శరీరం నుంచి కాళభైరవుడిని స`ష్టించి బ్రహ్మ ఐదు తలల్లో ఒకదానిని ఖండిస్తాడు. ఈ కాళభైర రూపంలో ఉన్న శివలింగం తిరువణ్ణామలై కాగా ఆశ్రమంలో మనకు కనిపిస్తుంది.

భిక్షాటన మూర్తి దేవాలయం

P.C: You Tube

బ్రహ్మ ఐదు తలల్లో ఒక తల తలను నరకడం వల్ల పాపం మూటగట్టుకొన్న పరమశివుడు భిక్షాటన రూపంలో లోకసంచారం మొదలు పెడుతాడు. అటు పై ఆ భిక్షాటనమూర్తి కాశీకి వెళ్లి తన పాపాన్ని ప్రాయశ్చిత్తం చేసుకొంటాడు. ఆ భిక్షాటనమూర్తి దేవాలయం తమిళనాడులోని తిరువణ్ణామలైలోని అణ్ణామలై దేవాలయంలో ఉపాలయంగా మనం చూడవచ్చు.