నగరంలోని ప్రధాన పర్యాటక ఆకర్షణ అయిన కిలా ముబారక్ సముదాయం సిక్కుల రాజభవన నిర్మాణ శైలికి ఉత్తమ ఉదాహరణ. పాటియాలా నగరం అంతా కిలా ముబారక్ సముదాయం చుట్టూనే ఎదిగింది. 1764 లో మహారాజా ఆలా సింగ్ నిర్మించిన ఈ సముదాయం, పాత మోతీ బాగ్ భవనం నిర్మించే దాకా పాటియాలా రాజ కుటుంబీకుల నివాస భవనంగా వుండేది. ముందుగా పది ఎకరాల స్థలంలో మట్టి గోడలతో నిర్మించిన ఈ కోటను తరువాత పక్కా కోటగా నిర్మించారు.

ఈ సముదాయాన్ని కిలా అంద్రూన్ అనే లోపలి భాగం, దర్బార్ హాల్ గా పిలిచే బయటి భాగంగా విభజించారు. దర్శనీ ద్వారం, శివాలయం, సంప్రదాయ దుస్తులు, నగలు అమ్మే దుకాణాలు పర్యాటకులను ఆకర్షిస్తాయి. ఈ ప్రాంతంలోని నిర్మాణ శైలి మొఘలాయిలు, రాజస్థానీ శైలుల మిశ్రమానికి చక్కటి ఉదాహరణ.