శీతాకాల‌పు విహార‌యాత్ర‌కు ఖ‌ర్చులు త‌గ్గించే ఆర్థిక ప్ర‌ణాళిక‌

ఆ ఖ‌ర్చు వృథా ఖ‌ర్చు కాదు..

మ‌న‌సుకు న‌చ్చే ప్ర‌దేశానికి విహారయాత్ర అనేది వృథా ఖర్చు కాదు. ఇది ఒకరకంగా మన శారీరక, మానసిక ఆరోగ్యానికి అవసరమైన పెట్టుబడి. అందుకే నెలవారీగా మిగతా ఖర్చులు, పెట్టుబడులకు జీతంలో నుంచి కేటాయింపులు జరిపినట్లే.. దీనికి కూడా కొంత కేటాయించాలి.

విహార‌యాత్ర‌ల‌ కోసం మీ వార్షికాదాయంలో కనీసం 5 శాతం కేటాయించొచ్చు. వెసులుబాటును బట్టి 7 శాతం దాకా పక్కన పెట్టొచ్చు. అంతకు మించి మరీ 10 శాతం దాకా పెడితే.. మీ పెట్టుబడి ప్రణాళికలపై ప్రతికూల ప్రభావం పడే అవకాశం ఉంటుంది. కాబట్టి జాగ్రత్త వహించాలి.

విడిది చేసేందుకు స‌రైన ప్లాన్ అవ‌స‌రం..

ఈ సీజ‌న్‌లో విహార కేంద్రాల‌లో ధ‌ర‌లు అధికంగా ఉంటాయి. అయితే, సీజ‌న్ ఏదైనా సుదీర్ఘమైన సెలవులు గడిపేందుకు కొత్త ప్రాంతానికి వెళ్లినప్పుడు హోటల్స్ కోసం వెతుక్కుంటూ కూర్చోకుండా... స్వల్ప చార్జీలకు ఆతిథ్యమిచ్చే హోమ్‌స్టే అవకాశాలు కూడా పరిశీలించవచ్చు.

వారాంతపు సెలవులో సైట్ సీయింగ్ లేదా ట్రెక్కింగ్ చేయదల్చుకుంటే.. ఇలాంటి హోమ్‌స్టే చౌకగాను, అనువుగాను ఉంటుంది. ఒకవేళ మీకేదైనా క్లబ్‌లో సభ్యత్వం ఉంటే.. మీరు వెళ్లే ప్రాంతాల్లో దానికి శాఖలు గానీ అనుబంధ ప్రాపర్టీలు గానీ ఉన్నాయేమో ఒకసారి పరిశీలిస్తే ఉపయోగకరంగా ఉంటుంది. ఇక ఒక్కొక్క సందర్భంలో హాలిడే రాయితీలు లభించే అవకాశాలూ ఉంటాయన్న విషయం గమనంలో ఉంచుకోవాలి.

కొంత రాజీ పడటంలో తప్పు లేదు..

మీరు చేరుకోవాల‌నుకున్న ప్ర‌దేశం, టైమింగ్ లాంటి విషయాల్లో అవసరమైతే కొంత రాజీపడేందుకు వెనకాడనక్కర్లేదు. ఒకోసారి ఇలాంటి వాటి వల్ల ఊహించని కొంగొత్త అనుభవాలు ఎదురుకావొచ్చు. సెలవులు ఎక్కువ‌గా ఉన్న‌ట్ల‌యితే, హాలిడే వెకేషన్ గడిపేందుకు రెండు మూడు ప్ర‌దేశాల‌ను ప్లాన్ చేసుకోవ‌డం మంచిది. ఇది పీక్ సీజన్ క‌నుక ప‌ర్యాట‌కుల‌ రద్దీ ఎక్కువ‌గా ఉంటుంది. అయితే, సర్వీసూ మెరుగ్గా ఉంటుంది.

ఉదాహరణకు.. గోవా వెళ్లేందుకు నవంబర్ నుంచి మార్చి దాకా రద్దీ సీజన్‌గా ఉంటుంది. డిసెంబర్ 20 నుంచి జనవరి 10 మధ్యలో రేట్లు ఒక్కసారిగా రెట్టింపయిపోతాయి. బీచ్ పక్కనే ఉండే 5 స్టార్ హోటల్, కాస్త కిలోమీటరు లోపల ఉండే 4 స్టార్ హోటల్‌లోనూ రేట్ల వ్యత్యాసం ఒకోసారి దాదాపు 50 శాతం దాకా కూడా ఉంటాయి. ఇలా ఒక్కొక్క‌టీ ప్ర‌ణాళికాబ‌ద్దంగా లెక్క‌లు వేసుకుంటే మీ శీలాకాల‌పు విహార‌యాత్ర ఎన్నో అనుభూతుల‌ను అందిస్తుంది.