వెంబనద లేక్ ని వెంబనద్ కాయల్ అని కూడా పిలుస్తారు. దీని పైనే ద్వీపాల సమూహం ద్వారా కుమరకొం ప్రాంతం ఏర్పడింది. సహజమైన నీటి అందాలతో ఈ ప్రాంతం పర్యాటకులని ఆకర్షిస్తుంది. కేరళ రాష్ట్రం లో నే అతి పెద్ద సరస్సు గా అలాగే దేశం లో నే అతి పొడవైన సరస్సుగా రికార్డు కలిగి ఉంది. అనేక జిల్లాలకు ఈ సరస్సు విస్తరిస్తుంది. ఈ సరస్సు పున్నామద కాయల్ మరియు కొచ్చి లేక్ గా కూడా ప్రసిద్ది. సంవత్సరానికి ఒక సారి ఓనం పండుగ సమయంలో నిర్వహించబడే నెహ్రు ట్రోఫీ బోటు రేసులకి ఈ సరస్సు ప్రసిద్ది చెందింది. వీక్షకులకు కనువిందు చేసే విధంగా వివిధ ప్రాంతాల నుండి పలు పడవలు ఈ చారిత్రాత్మక బోటు రేసులలో పాల్గొంటాయి.వెంబనద్ లేక్, కేరళ బ్యాక్ వాటర్ పర్యాటక రంగానికి వెన్నెముక వంటిది. ప్రపంచవ్యాప్తంగా లక్షలాది మంది పర్యాటకులని ఆకట్టుకోవడంలో ఈ లేక్ ప్రముఖ పాత్ర పోషిస్తోంది.
ఈ లేక్ పై వందలాది హౌస్ బోటు లు ప్రయాణించే దృశ్యం అత్యంత మనోహరమైనది. ఈ లేక్ లో తూర్పు భాగం వివిధ రకాల వలస పక్షులకి నిలయం. అంతే కాదు, కుమరకొం బర్డ్ సాంచురి ఈ ప్రాంతంలో ప్రధాన పర్యాటక ఆకర్షణ.