దొంగల గుహ ... మాయమవుతుంది, దర్శనం ఇస్తుంది !

అనగనగా ఒక గుహ .. ఆ గుహలో దొంగలు తాము దోచుకున్న సంపదను దాచేవారు. అవసరమైనప్పుడు తీసుకొనేవారు. వారికిది సొమ్మును దాచుకొనే రహస్య బ్యాంకు. మీకో విషయం తెలుసా ? ఈ గుహ అకస్మాత్తుగా మాయమవుతుంది మరియు తిరిగి దర్శనం ఇస్తుంది. ఇదొక దొంగల గుహ అందుకే దీనిని రాబర్స్ కేవ్ అన్నారు.

ఎక్కడ ఉంది ? ఎలా వెళ్ళాలి ?

రాబర్స్ కేవ్ ఉత్తరాఖండ్ రాష్ట్రంలోని డెహ్రాడూన్ లో కలదు. ఈ ప్రదేశాన్ని గుచ్చా పానీ అని కూడా అంటారు. డెహ్రాడూన్ నుండి 8 కిలోమీటర్ల దూరంలో ఈ గుహ ఉన్నది. ఇక్కడికి చేరుకోవటానికి పర్యాటకులు డెహ్రాడూన్ లోని అనర్వాల గ్రామం నుంచి ప్రభుత్వ బస్సులో ఎక్కి వెళ్ళవచ్చు. అక్కడి నుండి గమ్యానికి కోలోమీటర్ ట్రెక్ ద్వారా చేరుకోవచ్చు.

రాబర్స్ కేవ్ ప్రవేశం

చిత్ర కృప : Kaustav Bhattacharya

ఇది కూడా చదవండి : వినాయకుడు జన్మించిన ప్రదేశం !

రాబర్స్ కేవ్ అనే ప్రదేశం డెహ్రాడూన్ లో అత్యంత ప్రజాదరణ పొందిన పిక్నిక్ స్థలం. రాబర్స్ కేవ్ నిజంగా ఒక అద్భుత స్థలం. రెండు కొండల మధ్య ఒక సన్నటి పొడవాటి లోయ ఉంటుంది. ఆ లోయలో నీరు నిరంతరం ప్రవహిస్తూ ఉంటుంది.

గుహలో ప్రవేశించే నీరు

చిత్ర కృప : Kaustav Bhattacharya

లోయలోని నీళ్లపై, పై నుండి పడే సూర్యకాంతి కిరణాలు ... ఆ నీళ్లను ధగధగ మెరుస్తూ ఉండేలా చేస్తాయి. నీటి ప్రవాహ వేగం అధికంగా ఉంటుంది. ఆ నీళ్లు చల్లగా, కాళ్ళను స్పర్శిస్తూ అనుభూతికి గురిచేస్తాయి.

పూర్వం దొంగలు దోచుకున్న సిరిసంపదలను గుహలో దాచేవారట. అవసరమైనప్పుడు బయటకు తీసేవారట. సంపద ను దాచిపెట్టిన ప్రదేశం మరిచిపోకుండా ఉండటానికి కొండ గుర్తులను రాతి గుహ ల మీద చెక్కేవారట. అందుకనే దీనికి 'రాబర్స్ కేవ్ (దొంగల గుహ)' అన్న పేరువచ్చింది.

గుహ పై నుండి పడే నీటి ధారలు

చిత్ర కృప : Infraredd

గుహలో ప్రవేశించి లోనికి వెళుతుండగా మధ్యమధ్యలో నీటి తుంపరలు పై నుండి మీద పడుతూ ఉల్లాసాన్ని కలిగిస్తాయి. రాతి గోడలపై పాములు కూడా అక్కడక్కడ చేతికి తగులుతుంటాయట. ఇటువంటి సంఘటనలు ఎన్నో మీకు అక్కడ కనిపిస్తాయి. అచ్చం సినిమాలో మాదిరి నిధులు దాచిపెడితే .. అక్కడికి హీరో వెళ్లి తీసుకొచ్చేటప్పుడు అతనికి ఏ ఏ అడ్డంకులు, అవరోధాలు ఏర్పడతాయో అవన్నీ మీరు ఇక్కడ అనుభవిస్తారు.

ఇది కూడా చదవండి : ఆంజనేయస్వామిని వెలేసిన ఊరు !

లోనికి వెళ్లే కొలది చీకటి

చిత్ర కృప : SridharNegi

రాబర్స్ కేవ్ లో అలాగే నడుస్తూ ముందుకు వెళితే, కొన్ని కొన్ని చోట్ల రెండు కొండల మధ్య దూరం చాలా తక్కువగా ఉంటుంది (బస్సు డొర్ అంత). మధ్య మధ్య లో రాళ్ళు దారికి అడ్డదిడ్డంగా ఉంటాయి. కొన్ని చోట్ల రాళ్ళూ ఎగుడుదిగుడుగా వుండి, నడకకు కాస్త ఇబ్బందిగా ఉంటాయి. అసలే అక్కడ నీటి ప్రవాహం వేగంగా ఉంటుంది. ఇక్కడ లోతు కూడా ఎక్కువే !. కనుక జాగ్రత్తగా వెళ్ళాలి. ఆ నీటి ప్రవాహంలో సుమారు 4-5 కిలోమీటర్లు యిట్టె నడవచ్చు. ఓపిక ఉంటె చివరన ఉన్న ఇంకో దారి గుండా బయటకు రావచ్చు.

రాబర్స్ కేవ్ కు వెళ్లే దారి

చిత్ర కృప : mohandep

మీరు డెహ్రాడూన్ ను సందర్శించేటప్పుడు ఈ రాబర్స్ కేవ్ ను సందర్శించడం మరిచిపోవద్దు !

ఇతర ఆకర్షణలు

టిబెట్ బుద్దిస్ట్ ఆలయం, తప్కేశ్వర్ మహాదేవ్ ఆలయం, మిన్డ్రోల్లింగ్ మొనాస్టరీ, లాచివాలా, మాల్సి డీర్ పార్క్ మరియు రాజాజీ నేషనల్ పార్క్ మొదలైనవి డెహ్రాడూన్ లో సందర్శించవలసిన ప్రదేశాలు.

డెహ్రాడూన్ ఎలా చేరుకోవాలి ?

బస్సు /రోడ్డు మార్గం : డెహ్రాడూన్ న్యూ ఢిల్లీ నుండి 245 KM ల దూరంలో కలదు. ప్రతి రోజూ బస్సు సర్వీసు ఉంటుంది. రాష్ట్రంలోని అన్ని ప్రాంతాల నుండి కూడా డెహ్రాడూన్ కు ప్రభుత్వ బస్సులు నడుస్తాయి.

రైలు మార్గం : డెహ్రాడూన్ లో రైల్వే స్టేషన్ కలదు. ఢిల్లీ, కోల్కత్తా, ముంబై, లక్నో మొదలైన ప్రాంతాల నుండి రైళ్లు ఇక్కడికి నడుస్తుంటాయి.

విమాన మార్గం : డెహ్రాడూన్ లో ఎయిర్ పోర్ట్ కలదు. ఇది ఢిల్లీ ఎయిర్ పోర్ట్ తో అనుసంధానించబడింది.