Click it and Unblock the Notifications
కర్నాటకలోని కాబిని ప్రాంతం వన్య జీవులకు ప్రసిద్ధి గాంచింది. ఇది నాగర్ హోలే అటవీ ప్రాంతంలో ఒక భాగం. బెంగుళూరుకు 163 కి.మీ. దూరంలో ఉన్న ఈ పర్యాటక స్ధలానికి సందర్శకులు ఎంతో ఇష్టంగా వస్తారు. కాబిని అటవీ ప్రాంతాన్ని అక్కడ కాబిని నది ప్రవహిస్తుండటం చేత, కాబిని పర్యాటక స్ధలంగా పేరు పెట్టారు. నాగర్ హోల్ అటవీ ప్రాంతానికి ఇది ఆగ్నేయంగా ఉంది. సుమారు 55 ఎకరాల ప్రదేశం విస్తరించి దట్టమైన అడవులు, అనేక ఎత్తులు, పల్లాలు, సరస్సులు, ప్రవాహాలు కలిగి రమణీయమైన ప్రదేశంగా చెప్పబడుతుంది.
కాబిని డ్యామ్ ఇక్కడ ఒక పెద్ద సరస్సును ఏర్పాటు చేయటంతో అక్కడకల గ్రామం ఒకటి దానిలో ముణిగిపోయింది. ఫలితంగా ఆ గ్రామం పేరుతో మస్తిగుడి సరస్సు అని దానికి నామకరణం చేశారు. ఈ డ్యామ్ నాగర్ హోల్ ప్రాంతాన్ని బండిపుర అటవీ ప్రాంతాన్ని వేరు చేస్తుంది. ఆశ్చర్యం కలిగించే జంతు జాలం! ఈ ప్రాంతమంతా వివిధ రకాలుగా వర్షాలు పడి మొక్కలు కూడా కొన్ని ప్రదేశాలలో చిన్నవి గాను, భారీ వర్షాలు పడే చోట పెద్దవిగాను పెరుగుతూంటాయి. ప్రతి సంవత్సరం కొన్ని ప్రాంతాలలో షుమారు 1000 మి.మీ. కంటే అధికంగా కూడా వర్షపాతం నమోదవుతుంది.
నాగర్ హోల్ అటవీ ప్రాంతంలో పచ్చటి ఆకులు, మొక్కలు తిని జీవించే జంతుజాలం అధికంగా ఉంది. వాటిలో ఏనుగుల సముదాయాలు ప్రత్యేకం. ఈ ప్రాంతంలో ఆసియా ఏనుగులు అధికంగా ఉంటాయి. ఏనుగు శాకాహారి. అధికంగా ఆకులను, కొమ్మలను తింటుంది. కనుక వాటికి ఆహారం విశేషంగా దొరుకుతున్న కారణంగా అక్కడ అవి అధికంగా పెరుగుతాయి. ఈ మొక్క ఆహారాన్ని తినే జంతువులు లేడి, దుప్పి, జింకలు, సంభార్, అటవీ పందులు, కోతులు, ఎన్నో కూడా ఉంటాయి. వీటిని ఆహారంగా తింటూ మరి కొన్ని జంతువులైన పులులు, చిరుత పులులు, వేట కుక్కలు వంటివి కూడా ఈ ప్రాంతంలో పెరుగుతాయి.
అడవిలో సఫారిపై వెళితే, అనేక జంతువులను దగ్గరనుండి చూడవచ్చు. కాబినిలో 300 రకాల పక్షి జాతులు కూడా ఉండి పక్షుల జీవనంలో ఆసక్తి కలవారికి ఈ ప్రాంతం మరింత ఆకర్షణ కలిగిస్తుంది. దీనిని వారు ఒక స్వర్గంగా భావిస్తారు. కాబినిలో ప్రధాన ఆకర్షణ అంటే, జంగిల్ సఫారి మరియు ఎనుగుల సఫారి. సరస్సులలో బోట్ విహారం చేస్తూ అక్కడి మొసళ్ళు, నీరు తాగే జింకలను చూసి ఆనందించవచ్చు.
అడవులలో నడక, ట్రెక్కింగ్, బోట్ విహారం, సైకిలింగ్, పక్షుల గమనం, రాత్రులలో చలిమంటలు, స్ధానికిగ్రామాల సందర్శనలతో ఎంతో ఆనందం పొందుతారు. కాబిని దేశంలోనే ఒక సహజ సెలవుల విశ్రాంతి ప్రదేశంగా చెప్పబడుతోంది. కర్నాటక రాష్ట్రంలో తప్పక చూడవలసిన ప్రదేశాలలో కాబిని ఒకటి. కనుక ఎట్టి పరిస్ధితులలోను ఈ ప్రాంత సందర్శన మరువకండి.
