చూసొద్దామా.. కృత్రిమ‌ శిలా ఉద్యాన‌వ‌నాన్ని

గైడ్ చెప్పిన విశేషాలు

అక్కడే ఉన్న గైడ్‌ను ఆ ప్రాంతం గురించి వివరించమని అడిగాం. ఒకవైపు కొత్త ప్రాంతం నిర్మాణం జరుగుతుంటే, మరోవైపు దానిపక్కనే ఉన్న కొన్ని గ్రామాలన్నీ ఖాళీ అయ్యాయి అంటూ చెప్పుకొచ్చారు. అప్పట్లో ఇక్కడ చాలా భవనాలు, పురాతన కట్టడాలు తొలగించబడ్డాయట! అందులో గాజు వస్తువులు, గాజులు, టైల్స్, సిరామిక్ కుండలు, సింకులు, విద్యుత్ వ్యర్ధపదార్థాలతో ఆ ప్రాంతమంతా చెత్తతో నిండిపోయింది. పాత వస్తువులన్నీ కుప్పలు తెప్పలుగా మిగిలిపోయాయి. ఆ సమయంలో ఈ చెత్తంతా ఎక్కడ వేయాలని అక్కడున్న వారంతా ఆలోచనలోపడ్డారు. ఈ చెత్తనంతా కాపిటల్ కాంప్లెక్స్‌ ఉన్న ఓ స్థలంలో స్టోర్ చేశారు. అప్పటి పిడబ్ల్యూడి విభాగం పర్యవేక్షడు నేక్ చంద్ ఆలోచనల నుంచి పుట్టిందే ఈ రాక్ గార్డెన్ అని చెప్పారు.

ఎన్నో అడ్డంకుల‌ను అధిగ‌మించి..

నేక్‌చంద్‌ ఉదయమంతా అక్కడ కాపలాగా ఉండి, రాత్రి సమయాల్లో ఎవరికీ కనపడకుండా రహస్యంగా

వెళ్లి ఓ ప్రాంతంలో వీటిని తన కలలకు ప్రతిరూపాలుగా తీర్చిదిద్దారు. అలా ఎన్నో రాత్రులు అతను అక్కడే గడిపాడు. 18 ఏళ్లపాటు చీకటి రాత్రుల్లోనే ఎవరికీ తెలియకుండా ఈ రాతి తోటను సృష్టించాడు. రాత్రివేళ రహస్యంగా సమీపంలోని అడవికి వెళ్లి, రాళ్లను చేతులతో మోసుకొచ్చేవాడు. కొండ ప్రాంతాలకు సైకిలుపై వెళ్లి, పెద్ద పెద్ద రాళ్ల తీసుకొచ్చేవాడు. కూల్చివేసిన భవనాల నుంచి వ్యర్థాలను సేకరించి తెచ్చేవాడు. వీటన్నింటి మిశ్రమంతో నృత్యభంగిమల్లో ఉన్న సంగీతకారుల శిల్పాలు, జంతువులకు సంబంధించిన శిల్పాలను ఏర్పాటు చేశాడు. అది అటవీ ప్రాంతం కనుక, చాంద్ నిర్మాణాలు అన్నీ అక్రమమైనవని, తొలగించాలని అప్పటి ప్రభుత్వం నిర్ణయించింది. అయితే, చాంద్ ప్రజాభిప్రాయం సేకరించి, ఇదొక గొప్ప పర్యాటక స్థలం కాగలదని నిరూపించాడు. అలా 1975లో దీన్ని అధికారికంగా గుర్తించారు. 1976 నుంచి సందర్శకుల కోసం తెరిచారు. తర్వాత ఈ వనాన్ని మరిన్ని శిల్పాలతో విస్తృతపరిచారు. దీనిద్వారా చాంద్ అంతర్జాతీయంగా గుర్తింపు పొందారు. పలు విదేశీ సంస్థలు ఆయన్ను సత్కరించాయి. విదేశీ మ్యూజియంలలో చాంద్ శిల్పాలకు చోటు దక్కింది.

పురాతన కట్టడాలూ ఉన్నాయి..

విరిగిన గాజు ముక్కలు, పగిలిన కుండలు, సిరామిక్ టైల్స్, మాడిన బల్బులు, సీసాలు, కత్తిరించిన జుట్టు వంటి ముడిపదార్థాలను ఈ నిర్మాణాలకు ఉపయోగించారు. క్రమంగా అవన్నీ అద్భుతమైన 20,000 కళాకృతులుగా రూపుదిద్దుకున్నాయి. 12 ఎకరాల స్థలంలో 18 ఏళ్లపాటు కృషి చేసి.. దేశంలోనే ప్రత్యేక కుత్రిమ‌ ఉద్యానంగా మార్చారు. నాట్యకారులు, సంగీత వాద్యకారులు, వివిధ జంతువులు, రాతి మేడలు, తోరణాలు, జలపాతాలు, సింహాసనం, కళారూపాలతో అద్భుత సామ్రాజ్యాన్ని నిర్మించారు. ప్రస్తుతం ఇది 40 ఎకరాల మేర విస్తరించి ఉంది. నేక్ చంద్ కలలు ఈ గార్డెన్ ఆధునికతను కాకుండా పురాతన కట్టడాలనూ చూపించారు.

జాలువారే కృత్రిమ జలపాతాల సవ్వడులు మమ్మల్ని ఎంతగానో ఆకర్షించాయి. ఈ గార్డెన్లో వేసే ప్రతి అడుగూ మరుపురాని మధురమైన అనుభూతుల సమ్మేళనమే. అలా తిరుగుతూ ఎండకు చమటలు పట్టినా, ఆ కళాకృతుల అందాలు అలసటను దరి చేరనీయలేదు. ఓ గుహ దగ్గర కొద్దిసేపు కూర్చున్నాం. మళ్లీ లేచి, మరిన్ని అందాలను తిలకించాం.

అప్పటికే మేం వెళ్లాల్సిన సమయం ఆసన్నమైంది. మా తిరుగు ప్రయాణానికి సిద్ధమయ్యాం. రాక్ గార్డెన్‌లో నుంచి బయటికి వచ్చేశాం. క్యాంటిన్ దగ్గర ఆలూపరోటా తిన్నాం. దీనిని సీజ‌న్ బ‌ట్టీ ఉదయం ఏడు గంటల నుంచి రాత్రి ఏడు గంటల వరకు, చలికాలంలో అయితే సాయంత్రం ఆరు వరకూ తెరిచి ఉంచుతారు. వారంలో ఏడు రోజులూ తెరిచే ఉంటుంది. ఇరవై రూపాయలు దీనికి ఎంట్రీ ఫీజు. అక్కడి నుంచి సెక్టార్ సత్రవా బస్‌స్టాప్‌కు వెళ్లాం. అక్కడి నుంచి క్లాక్‌రూం దగ్గరికి వెళ్లి మా సామాన్లు తెచ్చుకున్నాం. అక్కడి నుంచి మా ప్రయాణం ఎయిర్‌పోర్ట్‌కు సాగింది.

ఎలా చేరుకోవాలి?

చండీగఢ్ విమాన, రైలు, రోడ్డు మార్గాల ద్వారా దేశంలోని అన్ని ప్రదేశాల నుంచీ సులభంగా చేరుకోవచ్చు. చండీగఢ్ రైల్వే స్టేషన్ వ్యూహాత్మకంగా సెక్టార్ 17 వద్ద ఉంది. అయితే నగరంలో దేశీయ విమానాశ్రయం నగర కేంద్రానికి ఎనిమిది కిలోమీటర్ల దూరంలో ఉంటుంది. బ‌స్సు సేవలు సెక్టార్ 17, సెక్టార్ 43లో ఇంటర్ స్టేట్ బస్ టెర్మినల్ నుంచి అందుబాటులో ఉంటాయి.