Click it and Unblock the Notifications
ఢిల్లీలోని క్రాఫ్ట్స్ మ్యూజియం.. విభిన్న సంస్కృతుల సంగమం
దేశ రాజధాని ఢిల్లీ భారతదేశంలోని విభిన్న సంస్కృతుల సంగమం. దేశంలోని దాదాపు అన్ని రకాల పర్యాటకులకు ఈ నగరం ఏదో ఒక ప్రత్యేకతను అందిస్తుంది. చరిత్ర ప్రేమికులకు ఎర్రకోట, ఇండియా గేట్ మొదలైనవి స్వ‌ర్గ‌ధామంగా నిలుస్తాయి. అందుకే అంటారు.. ఢిల్లీ నగరం పురాతనత్వం మరియు ఆధునికతల యొక్క అద్భుతమైన కలయిక అని. పురాతన ప్రదేశాల‌తోపాటు ఈ నగరం అత్యుత్తమ మ్యూజియంలకు కూడా ప్రసిద్ధి చెందింది.
అనేక ప్రాంతాల‌కు సంబంధించిన సంస్కృతిని ఒకేచోట సంద‌ర్శించేందుకు ఈ మ్యూజియంలు వార‌ధులుగా నిలుస్తాయి. అందుకే, వీటిని సందర్శించడానికి ప్రతిరోజూ వేలాది మంది దేశ‌విదేశీ పర్యాటకులు వ‌స్తూ ఉంటారు. ఈ ఆర్టికల్‌లో ఢిల్లీలోని అత్యంత ప్రసిద్ధ మ్యూజియంలలో ఒకదాని గురించి మీకు చెప్పబోతున్నాం. దాని విశేషాలు తెలుసుకున్న త‌ర్వాత మీరు కూడా త‌ప్ప‌కుండా దానిని సందర్శించాలనుకుంటారు.
అవును.. మీకు చెప్ప‌బోయే ప్రసిద్ధ మ్యూజియం పేరు నేషనల్ క్రాఫ్ట్ మ్యూజియం / నేషనల్ హ్యాండీక్రాఫ్ట్స్ అండ్ హ్యాండ్లూమ్స్‌ మ్యూజియం. క్రాఫ్ట్ మ్యూజియంను ప్రతి రోజు వేలాది మంది సందర్శిస్తారు. ముఖ్యంగా వారాంతాల‌లో కుటుంబ స‌మేతంగా ఇక్క‌డికి వ‌చ్చేందుకు ఎక్కువ మంది పర్యాటకులు ఆస‌క్తి క‌న‌బ‌రుస్తారు. ఢిల్లీలోని ప్రగతి మైదాన్ సమీపంలో ఉన్నందున, ఈ మ్యూజియంకు మరింత ప్రాముఖ్య‌త సంత‌రించుకుంది. ఈ మ్యూజియాన్ని చార్లెస్ కొరియా రూపొందించారు.
అప్పటి రాష్ట్రపతి రామస్వామి వెంకటరామన్ ప్రారంభించారు. ఎంతో చారిత్ర‌క నేప‌థ్యం ఉండ‌టం వ‌ల్ల ఇక్కడ భ‌ద్ర‌త కూడా చాలా క‌ట్టుదిట్టంగా ఉంటుంది. ఈ ప్రాంగ‌ణంలో ఏర్పాటు చేసిన విలేజ్ కాంప్లెక్స్‌లో అనేక తెగ‌ల జాన‌ప‌ద క‌ళాకారులు చిత్రించిన సంప్ర‌దాయ చిత్రాల‌ను చూడొచ్చు. దేశంలోని వివిధ ప్రాంతాల నుంచి ప్రతి నెలా కొత్త జాన‌ప‌ద క‌ళాకారులు వ‌చ్చి, ఇక్క‌డి గోడ‌ల‌పై కొత్త చిత్రాల‌ను చిత్రీక‌రిస్తారు. అందువ‌ల్ల ఎప్ప‌టిక‌ప్పుడు ఈ మ్యూజియం కొత్త రూపును సంత‌రించుకుంటుంది.
క్రాఫ్ట్స్ మ్యూజియం ఎందుకు ప్రత్యేకమైనది?
ఈ క్రాఫ్ట్ మ్యూజియం దేశంలోని వివిధ రాష్ట్రాలతో పాటు ఢిల్లీకి చాలా ప్రత్యేకమైనది. ఈ మ్యూజియంలో భారతదేశంలోని వివిధ రాష్ట్రాల నుండి సేకరించిన 33 వేలకు పైగా కలగలుపు సేకరణలు ఉన్నాయి. వీటిని దాదాపు 60 సంవత్సరాలుగా సేకరించారు. లోహ దీపాలు, కాంస్య, వెదురు చేతిపనులు, బట్టలు, శిల్పాలు, చెక్క శిల్పాలు, టెర్రకోట శిల్పాలు, గిరిజన చిత్రాలు మొదలైనవి ఈ చక్కటి మ్యూజియంలో చేర్చబడ్డాయి. ఇవి భారతీయ సంప్ర‌దాయాల‌కు ప్ర‌తీకగా క‌నిపిస్తాయి. ఇవన్నీ కాకుండా, ఈ క్రాఫ్ట్ మ్యూజియంలో జైన మందిరం, టెంపుల్ గ్యాల‌రీ, లైబ్రరీ, ఆడిటోరియం, పరిశోధనా కేంద్రం మరియు ప్రయోగశాల కూడా ఉన్నాయి. చారిత్ర‌క సంప‌ద‌పై ఇక్కడ అనేక ప‌రిశోధ‌న‌లు జ‌రుగుతుంటాయి.
ఈ అద్భుతమైన మ్యూజియాన్ని సందర్శించడానికి మీరు ఎప్పుడైనా వెళ్లొచ్చు. ఈ మ్యూజియం ఉదయం 10 గంటల నుండి సాయంత్రం 5 గంటల వరకు తెరిచి ఉంటుంది. భారతీయ పర్యాటకులకు దాదాపు 20 రూపాయలు, విదేశీ పర్యాటకులకు దాదాపు 200 రూపాయలు టిక్కెట్టు ధర ఉంటుంది. ప్రగతి మైదాన్ మెట్రో స్టేషన్‌కు చేరుకోవడం ద్వారా మీరు క్రాఫ్ట్ మ్యూజియంకు సులభంగా వెళ్ల‌వ‌చ్చు.
