సెప్టెంబరులో సందర్శించడానికి అనువైన ప్రసిద్ధ ప్రదేశాలు
ఈ ఏడాది జులై, ఆగస్ట్ మాసాల్లో భారీ వర్షాలు కురవడంతో చాలా మంది ప్రకృతి ప్రేమికులు తమ పర్యాటనలను వాయిదా వేసుకుంటూ ఉంటారు. అయితే, సెప్టెంబర్ నెల ప్రారంభం కాగానే సందర్శనకు ప్రణాళికలు సిద్ధం చేసుకుంటారు.
సెప్టెంబరు నెలలో ఏ ప్రదేశాలను సందర్శించాలి అనే ఆలోచనతో ఉన్నవారికి ఈ నేలపై పర్యటనకు అనువైన ప్రదేశాలను పరిచయం చేయబోతున్నాం. ఈ ప్రాంతాలను సందర్శించిన తర్వాత ఇంటికి తిరిగి రావడానికి ఇష్టపడరంటే నమ్మండి. ఈ ప్రదేశాలలో మీరు స్నేహితులు, కుటుంబం లేదా భాగస్వామితో కలిసి సరదాగా గడపొచ్చు.
కౌసని
కౌసని ఉత్తరాఖండ్లోని ఒక చిన్న గ్రామం. ఇది ప్రకృతి సౌందర్యంతో పర్యాటకుల మనసులో బాగా ప్రాచుర్యం పొందింది. ఈ చిన్న గ్రామంలో ఉన్న పచ్చదనం, దేవదారు చెట్లు మరియు హిమాలయాల ఆకర్షణీయమైన శిఖరాలు సందర్శకులను రా.. రమ్మని ఆహ్వానిస్తాయి. ఇక్కడ నివసించే స్థానికుల ఇండ్ల నిర్మాణం సైతం సందర్శకులను ఎంతో ఆకర్షిస్తాయి. ప్రకృతి మలచిన ఈ చిన్న గ్రామం పర్యాటకులకు స్వర్గంలా కనిపిస్తుంది. కౌసనిలో, రుద్రధారి జలపాతం, కౌసని టీ ఎస్టేట్, బైజ్నాథ్ టెంపుల్ మరియు గ్వాల్డామ్ వంటి ఉత్తమ ప్రదేశాలను సందర్శించవచ్చు.
డల్హౌసీ
స్నేహితులు, కుటుంబం లేదా భాగస్వామితో కలిసి సెప్టెంబర్లో సందర్శించడానికి డల్హౌసీ ఉత్తమమైన ప్రదేశంగా పరిగణించబడుతుంది. హిమాచల్లోని డల్హౌసీ దాని సహజ ప్రకృతి దృశ్యాలు, లోయలు, పూలు మరియు పచ్చిక బయళ్లకు అత్యంత ప్రసిద్ధి చెందింది. నేలపై పరచిన అందమైన పూలపాన్పులా కనిపించే మైదానాలు అదనపు ఆకర్షణగా నిలుస్తాయి. ఈ అద్భుతమైన ప్రదేశం యొక్క అందం మాటల్లో వర్ణించడం కష్టమే. ఈ ప్రదేశాన్ని 'మినీ స్విట్జర్లాండ్ ఆఫ్ ఇండియా' అని పిలుస్తారు. డల్హౌసీలో, మీరు ఖజ్జియార్, సత్ధార జలపాతం, పంచపులా మరియు కలాతోప్ వంటి ప్రదేశాలకు వెళ్లవచ్చు. మీరు ఇక్కడ రివర్ రాఫ్టింగ్ కూడా ఆనందించవచ్చు.
కూర్గ్
మీరు సెప్టెంబరులో దక్షిణ భారతదేశాన్ని సందర్శించాలని అనుకుంటే కర్నాటకలోని ప్రసిద్ధ హిల్ స్టేషన్ అయిన కూర్గ్కు వెళ్లవచ్చు. ఉత్కంఠభరితమైన దృశ్యాలు మరియు పచ్చని పరిసరాలతో నిండిన సుందరమైన లోయల కారణంగా దీనిని భారతదేశంలో స్కాట్లాండ్ అని కూడా పిలుస్తారు. ఎటు చూసినా పచ్చని ప్రకృతి మలచిన అందమైన దృశ్యకావ్యం పర్యాటకుల మనసును ఆహ్లాదపరుస్తుంది.
అంతేకాదు, కూర్గ్లో సందర్శించడానికి ఉత్తమమైన ప్రదేశాలు అబ్బే జలపాతం, నామ్డ్రోలింగ్ మొనాస్టరీ, ఇరుప్పు జలపాతం, మడికేరి కోట మరియు నీలకంఠి జలపాతాలు.
డార్జిలింగ్
సెప్టెంబరులో తూర్పు భారతదేశాన్ని సందర్శించేటప్పుడు, డార్జిలింగ్ పేరును మీ జాబితాలో మొదటి వరుసలో ఉంచుకోవాలి. డార్జిలింగ్ పశ్చిమ బెంగాల్లోని చాలా అందమైన హిల్ స్టేషన్. ఇది తూర్పు హిమాలయాల దిగువన సముద్ర మట్టానికి రెండు వేల మీటర్ల కంటే ఎక్కువ ఎత్తులో ఉంది.
హిమాలయాల యొక్క ఆకర్షణీయమైన శిఖరాలు మరియు మంత్రముగ్దులను చేసే ఇక్కడి ప్రకృతి అందాలు ఈ ప్రదేశాన్ని సందర్శకుల స్వర్గధామంగా పేరును తీసుకువచ్చింది. స్నేహితులు, కుటుంబం లేదా భాగస్వామితో సందర్శించడానికి డార్జిలింగ్ సరైన ప్రదేశం. ఇక్కడ మీరు టైగర్ హిల్, సింగలీలా నేషనల్ పార్క్, హిమాలయన్ రైల్వే మరియు బటాసియా లూప్ వంటి ప్రదేశాలను సందర్శించవచ్చు.