శ్రీవారి బ్రహ్మోత్సవాలు చూడటానికి రెండు కళ్ళూ చాలవు !

మొదటి రోజు

ధ్వజారోహణ

మొదటి రోజు ఆలయం సన్నిధిలో ధ్వజారోహణ చేస్తారు. కొత్త నూలు బట్ట మీద గరుడ బొమ్మ చిత్రీకరించి పతాకావిష్కరణ చేస్తారు. దాంతో స్వామి వారికి బ్రహ్మోతవాలు మొదలయినట్లే.

రెండవరోజు

శేషవాహనం

ధ్వజారోహణ తర్వాత రెండవరోజు శ్రీదేవి, భూదేవి సమేత శ్రీ మలయప్ప స్వామి వారిని పుష్పాలతో అందంగా అలంకరించి, వాహన మండపంలో ఉన్న పెద్ద శేషవాహనంపై ఊరేగిస్తారు. ఇది బ్రహ్మోత్సవాలలో ప్రధానమైనదిగా భావిస్తారు.

మూడవ రోజు

సింహవాహనం

మూడవ రోజైన సింహవాహన సేవ సమయంలో స్వామి వారు వజ్రఖచిత కిరీటంతో. సకల ఆభరణాలతో అలంకృతమై ఉంటాడు. ఆరోజు రాత్రి స్వామివారు తన ఉభయ దేవేరులతో కలిసి, అచ్చమైన భోగశ్రీనివాసునిగా ముత్యాలపందిరి వాహనంపై తిరువీధులలో ఊరేగుతారు.

నాలుగవ రోజు

కల్పవృక్షవాహనం

4 వ రోజు ఉదయం స్వామి వారు కల్పవృక్ష వాహనంలో దర్శనమిస్తాడు. ఆరోజు సాయంత్రం, సర్వభూపాల వాహనంమీద స్వామివారి వూరేగింపు, భక్తులకు కనులవిందుగా సాగుతుంది.

ఐదవ రోజు

మోహినీ అవతారం, గరుడవాహనం

స్వామి వారు 5 వ రోజున మోహినీ అవతారంలో దర్శనమిస్తాడు. దీనిని ఒక ప్రతేకత ఉంది. అన్ని వాహన సేవలు స్వామి వారి వాహన మండపంలో మొదలైతే, ఇదొక్కటే సేయువారి ఆలయం నుంచే పల్లకిలో మొదలవుతుంది. స్వామి వారు వజ్రాలు, రత్నాలు పొదిగిన హారాన్ని ధరించి, ఒక చేతిలో చిలుకను పట్టుకొని ఉంటాడు. అదే రోజు రాత్రి స్వామి వారు గరుడ సేవలో తరిస్తాడు.

ఆరో రోజు

గజవాహనం

ఆరో రోజు రాత్రివేళలో- స్వామివారు గజ వాహనం మీద తిరువీధులలో మెరిసి భక్తులను మురిపిస్తారు.

ఏడవ రోజు

సూర్య ప్రభ వాహనం

7 వ రోజు ఉదయం మలయప్ప స్వామి వారు సూర్యప్రభ వాహనంలో, సాయంత్రం చంద్రప్రభ వాహనంలో ఊరేగుతారు. సాయంత్రం చంద్రప్రభావ వాహన ఊరేగింపులో తెలుపు వస్త్రాలు, తెలుపు పుష్పనాలు, మాలలు దహరించటం విశేషం.

8 వ రోజు

రథోత్సవం

8 వ రోజు జరిగే రథోత్సవానికి హాజరైనట్లు, భక్తులు మరేరోజున కానరారు. సకల దేవతామూర్తులతో సర్వాంగ సుందరంగా అలంకరించిన ఆ రథాన్ని అధిరోహించిన మలయప్పస్వామి తిరువీధుల్లో ఊరేగి భక్తులను పరవశింపజేస్తారు.భక్తులు ప్రత్యక్షంగా పాలుపంచుకొని వాహన సేవ ఇది.

9 వ రోజు

చక్రస్నానం

బ్రహ్మోత్సవాలలో చివరిరోజైన 9 వ రోజు , స్వామివారికి చక్రత్తాళ్వార్‌ రూపంలో చక్రస్నానం చేయిస్తారు. ముందుగా వరాహస్వామి ఆలయ ఆవరణలో శ్రీదేవి, భూదేవితో సహా అభిషేకసేవలు జరిపిస్తారు. ఆ తర్వాత సుదర్శన చక్రానికి స్వామి పుష్కరిణిలో పుణ్యస్నానం చేయిస్తారు. ఇదే 'చక్రస్నాన ఉత్సవం'. చక్రస్నానం జరిగే సమయంలో స్వామి పుష్కరిణిలో స్నానాలు చేస్తే పాపాలు నశిస్తాయని భక్తుల విశ్వాసం.